नवी दिल्ली : वाढत्या मागणीचा पुरवठ्यावर परिणाम होऊन अंड्याच्या भावात चाळीस टक्क्यांनी वाढ झाली अाहे. अंड्याचा दर प्रति सात ते साडेसात रुपयांवर गेला अाहे, अशी माहिती पोल्ट्री फौंडेशन ऑफ इंडियाचे अध्यक्ष रमेश कात्री यांनी दिली.
आगामी महिनाभर अंड्याचे भाव चढेच राहतील, अशी शक्यताही त्यांनी व्यक्त केली. सोमवारी (ता.२१) पुण्यातील अंड्याचा भाव प्रति शंभर नग ५८५ इतका होता.
२०१६-१७ मध्ये अंड्याचे भाव ४ ते ५ रुपयांदरम्यान होते. राजधानी दिल्लीतील अंड्याचे सध्याचे भाव ७ ते साडेसात रुपये प्रति नग असून गेल्या चार वर्षांतील अंड्याच्या भावाचा हा उच्चांक असल्याचे श्री. कात्री यांनी सांगितले.
केंद्र सरकारच्या डेटानुसार २०१५-१६ मध्ये अंड्याचे उत्पादन ८३ अब्ज इतके होते, तर २०१६-१७ या आर्थिक वर्षामध्ये उत्पादनात वाढ झाली. काही ठिकाणी अंड्याचे भाव सोललेल्या चिकनपेक्षाही जास्त झाले असल्याचे चित्र आहे.
