अंडी दरातील घसरणीचा पोल्ट्रीधारकांना फटका

विटा, जि. सांगली ः मार्गशीर्ष महिना सुरू होण्यापूर्वी प्रतिअंडे दर पाच रुपये २० पैसे असा उच्चांकी पातळीवर पोचला होता. परंतु, आठ दिवसांतच प्रतिअंडे साडेतीन रुपये दर झाला. त्यामुळे पोल्ट्रीधारकांतून नाराजी व्यक्त होत आहे.

अंडी व्यापाऱ्यांच्या मनमानीमुळे व ‘नेक’च्या (अंडी समन्वय समिती) चुकीच्या धोरणामुळे अंड्यांच्या दरात सतत चढ-उतार सुरू आहेत. मार्गशीर्ष महिना सुरू होण्यापूर्वी ५.२० पैसे प्रतिअंडे दर मिळू लागला. परंतु, पुन्हा दर घसरू लागले. ७३ पैसे कमिशन वजा जाता सध्या प्रतिअंडे ३.५० रुपये दर पोल्ट्रीधारकांच्या हातात मिळू लागला आहे.

सध्या थंडीचे दिवस असल्याने अंड्याला मागणी आहे. मोठ्या प्रमाणात अंडी विक्री होत आहे. सध्या खानापूर तालुका व विटा शहरांत अकरा लाख अंड्यांवरील कोंबड्या आहेत. रोज आठ ते नऊ लाख अंडी उत्पादन होत आहे. चांगला दर मिळत असल्याने पोल्ट्रीधारकांनी अंड्यांचा साठा करून ठेवला होता. परंतु, व्यापाऱ्यांनी कमी दराने अंडी खरेदी सुरू केली आहे.

अंडी नाशवंत असल्याने त्याचा किती दिवस साठा करून ठेवणार, असे पोल्ट्रीधारक सांगत आहेत. अंडी व्यापारी साडेतीन रुपये दराने अंडी खरेदी करतात. त्याच अंड्याची किरकोळ विक्री सहा रुपयांनी केली जाते. त्यामुळे पोल्ट्रीधारकांचा ना नफा-ना तोटा असा व्यवसाय सुरू आहे.

देशी अंड्याला दहा रुपये दर संसाराला आर्थिक हातभार लागण्यासाठी सर्वसामान्यांनी देशी कोंबड्यापालन सुरू केले आहे. देशी अंड्यांना मागणी आहे. प्रतिअंडे पाच रुपये असलेला दर आता दहा रुपये झाला आहे. ‘नेक' अंड्याचे दर ठरवत असते. अंड्याचे दर कमी केले, की समितीशी संबंधित असलेले लोक करोडो रुपयांची गुंतवणूक करून मोठ्या प्रमाणात अंडी खरेदी करतात. त्याचा साठा करून पुन्हा १५ ते २० दिवसांनी समितीने दर वाढविला, की ती अंडी विक्री करून पैसे कमवायचे, असा उद्योग सुरू आहे. शासनाने या समितीवर नियंत्रण ठेवून शेतीपूरक व्यवसाय असणाऱ्या पोल्ट्री व्यवसायिकांना न्याय द्यावा. - शत्रुघ्न जाधव, पोल्ट्री व्यवसायिक, विटा