जळगाव जिल्हा परिषद पाणी योजनांचे वीज कनेक्‍शन तोडले

जळगाव : पाणी योजनांचे बिल भरण्यात आले नसल्याने थकीत बिलाची रक्‍कम वाढली. जास्त थकबाकी असलेल्या योजनांचे कनेक्‍शन कापण्याची कारवाई ‘महावितरण''कडून करण्यात येत आहे. आतापर्यंत जिल्हा परिषदेच्या उच्चदाब सामूहिक पाणीपुरवठा योजनांवरील पाच कोटी २१ लाख ८४ हजार रुपयांच्या थकबाकीपोटी पाच योजनांवरील वीजपुरवठा खंडित केला आहे. बोदवड तालुक्‍यासाठी महत्त्वाची असलेल्या ८० गावे पाणीपुरवठा योजनेचे कनेक्‍शन चार कोटी २० लाख रुपये थकबाकीपोटी कापले आहेत. ऐन दुष्काळात वीज कनेक्‍शन महावितरण कापत असल्याने ग्रामस्थांमध्ये संतापाची लाट पसरली आहे.

पाणी योजनांसाठी वीज वापरल्यानंतरही ग्रामपंचायतींकडून थकबाकी भरणा केला जात नाही. यामुळे दिवसेंदिवस वाढत जात जिल्ह्यातील ग्रामपंचायतींकडील थकबाकी १६९ कोटी ९१ लाखांवर पोचली आहे. जळगावमधील शेळगाव बॅरेज, जामनेर तालुक्‍यांतील तोंडापूर, चाळीसगाव तालुक्‍यांतील कळमडू एरंडोलातील अंतुर्ली, दहिगाव या योजनांचा वीजपुरवठा बंद करण्यात आला आहे.

 जिल्ह्यात एक हजार १५१ ग्रामपंचायती असून, यामध्ये पाणीपुरवठा योजनांसाठी दोन हजार २५० वीज कनेक्‍शन घेण्यात आले आहेत. गावांमध्ये पाणीपुरवठा करणाऱ्या योजनांसाठी दिलेल्या विजेचे बिल ग्रामपंचायतींनी करवसुलीच्या रकमेतून भरावयाचे असते; परंतु ग्रामपंचायतींकडून वसुली होत नसल्याने बिल भरणादेखील करण्यात येत नसल्याने सर्व कनेक्‍शनचे मिळून जिल्ह्यातील ग्रामपंचायतींकडे थकबाकी वाढली आहे.

जिल्ह्यातील पाणी योजनांवर गतवर्षी असलेली थकबाकी १४३ कोटी रुपयांवर होती. या वेळीही थकीत रक्‍कम वसुलीसाठी ''महावितरण''कडून मोहीम राबवत पाणी योजनांचे कनेक्‍शन कापण्यात आले होते. यानंतर जिल्हा परिषदेकडून पाण्याचे संकट टाळण्यासाठी काही थकबाकीची रक्‍कम भरली होती.