‘स्वाभिमानी’च्या आंदोलनामुळे गावांचा विद्युत पुरवठा सुरू

बुलडाणा ः देऊळगावराजा तालुक्यातील देऊळगाव मही येथे स्वाभिमानी शेतकरी संघटनेच्या कार्यकर्त्यांनी केलेल्या अांदोलनामुळे वीज कंपनीला खंडित पुरवठा सुरळीत करावा लागला. दहा ते बारा गावांची वीज पूर्ववत सुरू करण्यात अाली. कुठलीही सूचना न देता वीज कंपनीने देऊळगाव मही परिसरातील गावांचा वीजपुरवठा अचानक बंद केला. यामुळे शेतकरी त्रस्त झाले. शेतकऱ्यांनी या संदर्भात स्वाभिमानीचे नेते रविकांत तुपकर यांच्याकडे तक्रार केली. याची दखल घेत तुपकर यांनी वीज वितरण कंपनीच्या कार्यालयावर मोर्चा काढला. या वेळी वीज कंपनीचे विभागीय अभियंता श्री. कायंदे यांना घेराव टाकला. वीज कंपनीच्या कार्यालयाचा शेतकऱ्यांनी ताबा घेतला. बराच काळ ठिय्या आंदोलन केल्यानंतर तुपकर यांनी कार्यालय पेटवण्याचा इशारा दिला. त्यानंतर अधिकाऱ्यांनी वरिष्ठांशी चर्चा केली. खंडित केलेला वीजपुरवठा पूर्ववत सुरू करण्यात अाला. या आंदोलनात स्वाभिमानी संघटनेचे मराठवाडा कार्याध्यक्ष गजानन बंगाळे, बबनराव चेके, युवा आघाडीचे जिल्हाध्यक्ष सतीश मोरे ,वाशीमचे जिल्हाध्यक्ष दामोदर इंगोले, जितेंद्र खंडारे, शेख जुल्फेकार, विष्णू देशमुख, कुंडलिक शिंगणे, गजानन मुंढे, मधुकर शिंगणे, मधुकर वाघ, पंढरीनाथ म्हस्के यांच्यासह शेतकरी मोठ्या संख्येने सहभागी झाले होते.