उच्चदाब वितरण प्रणालीद्वारे १८ हजार कृषिपंपांना वीजपुरवठा

अकोला : महावितरणच्या अकोला परिमंडलात ३१ मार्च २०१८ पर्यंत कोटेशन भरून प्रलंबित असणाऱ्या १८ हजार ५२४ शेतकऱ्यांना कृषिपंपासाठी लवकरच ‘एचव्हीडीएस’ योजनेद्वारे वीज जोडणी मिळणार आहे. यासाठी महावितरणने जाहीर केलेल्या उच्चदाब वितरण प्रणाली योजनेतील (एचव्हीडीएस) कामांची ऑनलाइन निविदा प्रक्रीया पूर्ण झाली असून सुमारे ३१९ कोटी ८१ लाख रुपयांच्या कामांचे कार्यादेश कंत्रांटदारांना सुपूर्द करण्यात अाल्याची माहिती मिळाली अाहे. यामुळे अकोला परिमंडलातील अकोला, बुलडाणा व वाशीम जिल्ह्यांतील १८  हजार ५२४  कृषिपंपांना उच्चदाब वितरण प्रणालीच्या माध्यमातून वीज जोडणी मिळण्याचा मार्ग मोकळा झाला.

योजनेअंतर्गत यापुढे एका वितरण रोहित्रावर जास्तीत जास्त दोन ते तीन कृषिपंप राहणार आहेत. सततच्या विद्युत पुरवठा खंडित होण्याच्या कटकटीपासून यामुळे शेतकऱ्यांची कायमची सुटका होणार आहे.

अकोला परिमंडलात ३१ मार्च २०१८ पर्यंत कोटेशन भरून प्रलंबित असणाऱ्या १८ हजार ५२४ जोडण्यांचाही समावेश करण्यात आला होता. याशिवाय शेतकऱ्यांसह नव्याने मागणी करणाऱ्या ग्राहकाला या योजनेतून जोडणी मिळेल. सध्या ६३ व १०० केव्हीए क्षमतेच्या एका रोहित्रावरून साधारणतः २० ते २५  कृषिपंपांसाठी विद्युत पुरवठा केला जातो. अनधिकृत वापरामुळे विजेचा दाब वाढून रोहीत्र जळण्याचे प्रमाण अधिक आहे. प्रचलित पद्धतीमुळे लघुदाब वाहिनीची लांबी वाढते, वीज हानी मोठ्या प्रमाणात होते. शिवाय कृषिपंपांना कमी दाबाने वीजपुरवठा होतो. वीजपुरवठ्यात वारंवार बिघाड होतो. यावर ‘एचव्हीडीएस’ योजनेद्वारे या सर्वांवर मात करता येणे शक्य होणार असल्याचा दावा केला जात अाहे.

या नव्या योजनेमध्ये कृषिपंपांचे ऊर्जीकरण करण्याचे उद्दीष्ट निर्धारित करण्यात आले असून यातील कामे जलदगतीने पूर्ण व्हावीत यासाठी अकोला परिमंडळाचे मुख्य अभियंता डॉ. मुरहरी केळे यांच्या निर्देशानुसार उपविभागनिहाय कामांची आखणी करण्यात येऊन त्यानुसारच गतीने ऑनलाइन निविदा प्रक्रीया राबविण्यात आली. कामांचे कार्यादेश कंत्रांटदारांना सुपूर्द करण्यात आले आहेत.