नांदेडला ६८ हजार कृषिपंपांचा वीजपुरवठा खंडित

नांदेड : महावितरणच्या नांदेड परिमंडलातील नांदेड, परभणी, हिंगोली या जिल्ह्यांत दोन चालू त्रैमासिक वीज देयकांचा भरणा न केल्यामुळे रविवार (ता. २९) पर्यंत ६८ हजार १५५ कृषिपंपांचा वीजपुरवठा खंडित करण्याची कारवाई करण्यात आली आहे. या मोहिमेअंतर्गत १,२ ६४ कृषिपंपधारकांकडून ९४ लाख रुपये थकीत वीज देयकांची वसुली करण्यात आल्याची माहिती सूत्रांनी दिली.

नांदेड परिमंडलाअंतर्गतच्या नांदेड, परभणी, हिंगोली या तीन जिल्ह्यांत मंगळवार (ता. २४) पासून चालू वीज देयकांची (दोन त्रैमासिक देयके) वसुली मोहीम तसेच देयक भरणा न करणाऱ्या कृषिपंपधारकांचा वीजपुरवठा खंडित करण्याची कारवाई सुरू करण्यात आली आहे. या तीन जिल्ह्यांतील एकूण २ लाख ८६ हजार ८०१ कृषिपंपधारकांकडे जून २०१७ अखेर वीज देयकांची २ हजार १६२ कोटी ९९ लाख रुपये थकबाकी आहे.

महावितरणला वीज देयकांच्या थकबाकीमुळे आर्थिक संकटाला सामोरे जावे लागत आहे. त्याअनुषंगाने कृषिपंपधारकांकडील वीज देयक थकबाकी वसुली मोहीम हाती घेण्यात आली आहे. या मोहिमेअंतर्गत एप्रिल २०१७ ते सप्टेंबर २०१७ अखेर आकारण्यात आलेले चालू देयक (दोन त्रैमासिक देयकं) न भरल्यास त्यांचा वीजपुरवठा खंडित केला जात आहे.

वीजपुरवठा खंडित करू नये म्हणून १,२६४ कृषिपंपधारकांनी ९४ लाख रुपये भरणा केला आहे. वीजपुरवठा खंडित करण्याची कारवाई टाळण्यासाठी कृषिपंपधारकांनी देयकांचा भरणा करावा असे आवाहन महवितरणतर्फे करण्यात आले आहे.