एकाही शेतीपंपाचा वीजपुरवठा खंडित करू नका ः डॉ. भामरे

सटाणा, जि. नाशिक : वीजबिल वसुलीच्या नावाने कुठलीही पूर्वकल्पना न देता थेट वीजपुरवठा खंडित करणे चुकीचे अाहे. याबाबत सोमवारी (ता. ३०) राज्याचे मुख्यमंत्री व वीजमंत्र्यांशी चर्चा करण्यात येईल. मात्र तोपर्यंत एकाही शेतीपंपाची वीज खंडित करू नये, असे स्पष्ट निर्देश केंद्रीय संरक्षण राज्यमंत्री डॉ. सुभाष भामरे यांनी वीज वितरण कंपनीच्या अधिकाऱ्यांना दिले.

शासनाविरोधात भावना निर्माण करणारी ही कार्यपद्धती चुकीची असून, एरवी वसुलीबाबत काहीही न करता थेट पुरवठा खंडित करणाऱ्यांनी ही लोकशाही असल्याचे भान राखावे, असेही डॉ. भामरे यांनी या वेळी सुनावले.

नुकत्याच झालेल्या सार्वत्रिक निवडणुकीत सटाणा तालुक्यातून निवडून आलेल्या नवनिर्वाचित सरपंच व ग्रामपंचायत सदस्यांचा डॉ. भामरे यांच्या हस्ते रविवारी (ता. ३०) सत्कार करण्यात आला. त्यानंतर वितरण कंपनीच्या अधिकाऱ्यांची बैठक घेत डॉ. भामरे यांनी चर्चा केली.

सटाणा तालुक्यातील अनेक वर्षांपासून प्रलंबित असलेल्या सिंचनाच्या कामांसाठी केंद्र व राज्य शासनाकडून भरीव निधी आणून पिण्याच्या पाण्यासोबतच शेती सिंचनाची कामे मार्गी लागण्यात यश मिळाले आहे. त्यामुळेच ग्रामीण जनतेनेही शासनाच्या कार्याची पावती म्हणून थेट सरपंचपदाच्या निवडणुकीत भाजपाला जोरदार समर्थन दिले आहे, असे उद‍्गार डॉ. भामरे यांनी काढले.

या वेळी भाजप नेते अण्णा सावंत, डॉ. शेषराव पाटील, बाजार समितीचे मुख्य प्रशासक रमेश देवरे, जिल्हा उपाध्यक्ष डॉ. विलास बच्छाव, माजी नगराध्यक्ष बाळासाहेब सोनवणे, साहेबराव सोनवणे, रत्नाकर पवार, पंचायत समिती सभापती विमल सोनवणे, उपसभापती शीतल कोर, उपनगराध्यक्षा पुष्पा सूर्यवंशी, गटनेता महेश देवरे, आरोग्य सभापती दीपक पाकळे, नीलेश पाकळे आदी उपस्थित होते.