उपोषणासाठी बाजार समित्यांच्या कर्मचाऱ्यांची रजा

नाशिक : नियमनमुक्तीमुळे बाजार समित्यांचे उत्पादन घटले आहे. त्यामुळे आस्थापनेवर परिणाम होऊन वेळेत वेतन होत नाही. खासगी बाजार समित्यांमुळेही बाजार समितीच्या उत्पन्नावर परिणाम झाला आहे. त्यामुळे समित्यांची आर्थिक स्थिती मोडकळीस आली आहे. वेळेत नसलेले पगार, कर्मचाऱ्यांची नोकरीची नसलेली हमी यांसारख्या विविध प्रश्नांवर उभारलेल्या उपोषणास पाठिंबा देण्यासाठी जिल्ह्यातील विविध बाजार समित्यांचे कर्मचारी कार्यालयीन रजा घेऊन प्रातिनिधिक स्वरूपात मुंबई येथे उपोषणात सहभागी झाले. 

 बाजार समित्यांतील कर्मचारी शेतकऱ्यांची सेवा करतात. मात्र अनेक बाजार समित्यांमध्ये दिल्या जाणाऱ्या वेतनात तफावत आहे. काही बाजार समित्यांची आर्थिक स्थिती योग्य नसल्याने कर्मचाऱ्यांचे पगार काही महिन्यांपासून बंद आहेत. परिणामी अनेक कुटुंबीयांवर उपासमारीची वेळ आली आहे. त्यामुळे कर्मचाऱ्यांना शासन सेवेत सामावून घेण्यात यावे, वेतन वेळेवर मिळावे, अशा मागण्या मांडण्यासाठी जिल्ह्यातील बाजार समित्यांचे कर्मचारी सहभागी झाले. 

काही कर्मचारी बाजार समित्यांचे कामकाज बंद पडू नये म्हणून दैनिंदिन कामकाज पार पाडणार आहेत. जिल्ह्यात अनेक बाजार समित्यांमध्ये कांदा अनुदानासंदर्भात शेतकऱ्यांची कागदपत्रे जमा करण्याचे कामकाज सुरू आहे. कांदा उत्पादकाची गैरसोय होऊ नये म्हणून   बाजार समितीचे कामकाज सुरू राहणार आहे. अनेक कर्मचारी इच्छा असूनही सहभागी झाले नाहीत, असे कर्मचाऱ्यांनी सांगितले.