माजी आमदार कुंडलिकराव नागरे यांचे निधन

जिंतूर, जि.परभणी : जिंतूर विधानसभा मतदारसंघाचे काँग्रेसचे माजी आमदार तथा परभणी जिल्हा मध्यवर्ती बँकेचे विद्यमान अध्यक्ष कुंडलिकराव भगवानराव नागरे (वय ६६) यांचे रविवारी (ता.४) दुपारी दीडच्या सुमारास मुंबई येथे निधन झाले. सावळी बु. (ता.जिंतूर) येथील मूळ रहिवाशी असलेल्या नागरे यांनी १९९९ ते २००४ या कालावधीत जिंतूर मतदारसंघाचे प्रतिनिधित्व केले. आमदार असतांना औरंगाबाद विभागीय म्हाडाचे सभापती होते. त्यांनी म्हाडाची घरकुल योजना ग्रामीण भागात राबविली. त्यांच्या प्रयत्नातून जिंतूर येते दूध शीतकरण केंद्र सुरु करण्यात आले. २१ मे २०१५ पासून आजपर्यंत परभणी जिल्हा मध्यवर्ती सहकारी बॅंकेचे ते अध्यक्ष होते. पंधरा दिवसापूर्वी त्यांना अस्वस्थ वाटत असल्याने मुंबई येथील एका खासगी रुग्णालयात दाखल करण्यात आले. तीन दिवसापूर्वी त्यांच्यावर शस्त्रक्रिया करण्यात आली. रविवारी (ता.४) दुपारी त्यांची प्रणज्योत मालवली. यावेळी त्यांच्या पत्नी शोभाताई, सुरेश, बालाजी ही दोन मुले, बहिण मुक्ताबाई आंधळे, अन्य नातेवाईक उपस्थित होते. सोमवारी (ता.५) दुपारी १.३० वाजता येलदरी (ता.जिंतूर) येथील फार्म हाऊसच्या प्रांगणात त्यांच्यावर अंत्यसंस्कार करण्यात येणार असल्याचे त्यांच्या नातेवाईकांनी सांगितले.