निर्यातक्षम डाळिंब बागा नोंदणीस मुदतवाढ

पुणे ः युरोपियन देशांना डाळिंब निर्यात करू इच्छिणाऱ्या डाळिंब बागायतदारांना त्यांच्या बागेची नोंदणी कृषी विभागाकडे अनारनेटद्वारे करणे बंधनकाकारक केले आहे. यापूर्वी नोंदणी करण्यासाठी ३० जानेवारी ही अंतिम मुदत होती. मात्र, शेतकऱ्यांनी मागणी केल्यानंतर या नोंदणीसाठी मुदतवाढ देण्यात आली असून, आता २८ फेब्रुवारीपर्यंत शेतकऱ्यांना नोंदणी करता येणार आहे.  राज्यात डाळिंबाची लागवड प्रामुख्याने नाशिक, सोलापूर, नगर, सांगली, पुणे, सातारा, उस्मानाबाद या जिल्ह्यांत मोठ्या प्रमाणात केली जाते. तसेच बुलडाणा, जालना, बीड, औरंगाबाद, जळगाव व धुळे जिल्ह्यांतही क्षेत्र वाढत आहे. भारतातून डाळिंब निर्यात ही प्रामुख्याने संयुक्त अरब देश, बहरीन, ओमान, सौदी अरेबिया, श्रीलंका, बांगलादेश या देशांना केली जाते. परंतु मागील दोन वर्षांपासून युरोपियन युनियनमधील इंग्लड, जर्मनी, युनायटेड किंगडम, फ्रान्स, नेदरलँड, बेल्जिअम या देशांनाही निर्यात होत आहे.  राज्यातून ३१ जानेवारीअखेर हजार ते बाराशे शेतकऱ्यांनी नोंदणी केली आहे. मात्र, निर्यातीसाठी अजूनही अनेक शेतकरी इच्छुक असल्याने त्यांनी मुदतवाढीची मागणी केली होती. त्यानुसार ही मुदतवाढ दिली आहे. निर्यात करणाऱ्या इच्छुक शेतकऱ्यांनी संबधित माहितीसाठी जिल्हा अधीक्षक कृषी अधिकारी, तालुका कृषी अधिकारी यांच्याशी संपर्क साधावा, असे आवाहन निर्यात विभागाचे तंत्र अधिकारी गोंविद हांडे यांनी केले.