उपलब्ध संसाधनांचा वापर करून निर्यात वाढवा

लखमापूर, जि. नाशिक : देशात निर्यातीसाठी पोषक संधी आणि उत्कृष्ट शेती असतानाही जगाच्या पातळीवर शेतीप्रधान देशाची निर्यात मात्र दोन ते तीन टक्के आहे. ही बाब नक्कीच चिंताजनक आहे. उपलब्ध संसाधनांचा पुरेपूर वापर करून निर्यात वाढवा, असे आवाहन नाशिकचे विभागीय आयुक्त महेश झगडे यांनी केले. दिंडोरी तालुक्‍यातील जानोरी येथे हॉलकॉन येथील कृषी-फलोत्पादक व निर्यातदार यांच्यासाठी निर्यातीस वाव देण्यासाठी कृषी विभागाच्या वतीने बैठकीचे आयोजन केले होते. त्या वेळी ते बोलत होते.

श्री. झगडे म्हणाले, की शेतकरी व निर्यातदार यांनी प्रामाणिकपणे प्रयत्न करून निर्यात केली, तर नाशिक राज्यातच नव्हे तर देशात प्रथम क्रमांकावर जाण्यायोग्य परिस्थिती येथे स्थानिक पातळीवर आहे. त्यासाठी उपयुक्त साधन सामग्रीचा पूर्ण उपयोग केला गेला पाहिजे.

देशात निर्यातीसाठी पोषक संधी व उत्कृष्ट शेती असतानाही जगाच्या पातळीवर शेतीप्रधान देशाची निर्यात मात्र दोन ते तीन टक्के आहे. ही बाब चिंताजनक आहे. निर्यातीसाठी निर्यातदारांना व शेतकऱ्यांना आवश्‍यक सर्व सुविधा हॉलकॉनमध्ये आहे; मात्र तरीही त्याचा पाहिजे त्या प्रमाणात वापर होत नाही.

जो व्यापार होतो तोही बऱ्यापैकी मुंबई मधून होतो. यामुळे वेळ व खर्च वाढतो. मात्र अपेक्षित माल व्यापाऱ्यांना मिळत नसल्याने ते मुंबई मधूनच कारभार हाकतात. यासाठी व्यापाऱ्यांनी ग्राऊंड पातळीवरून काम करावे व शेतकऱ्यांनी अवश्‍यक त्या मालाची पूर्तता केल्यास शेतकरी व व्यापाऱ्यांना पैसे मिळतील, असेही महेश झगडे यांनी सांगितले.

या वेळी कृषी विभागाचे अधिकारी मासाळकर यांनी अपेडाच्या वतीने सुरू असलेल्या ग्रेपनेट व व्हिजनेट प्रणाली समजून सांगत निर्यातीमधील संधी आणि सध्याची तुलनात्मक स्थिती विशद केली. विभागीय कृषी सहसंचालक दिलीप झेंडे यांनीही मार्गदर्शन केले.

हॉलकॉनचे मुख्य कार्यकारी अधिकारी सुधाकर सेन यांनी निर्यातीसाठी उपलब्ध असलेल्या हॉलकॉनमधील सुविधांची माहिती देऊन त्याचा फायदा घेण्याची विनंती केली. या वेळी विभागीय कृषी सहसंचालक दिलीप झेंडे, उपविभागीय कृषी अधिकारी दिलीप देवरे, जिल्हा कृषी अधीक्षक तुकाराम जगताप आदी उपस्थित होते.