खानदेशात कांदा लागवड निम्म्याने घटण्याचा अंदाज

जळगाव : खानदेशात यंदा उन्हाळ कांद्याची लागवड निम्म्याने घटेल, असा अंदाज आहे. कांदा पट्ट्यात विहिरींची जलपातळी कमी झाल्याने कांदा लागवड कमी होणार असून, यंदा रोपवाटिकादेखील कमी आहेत.

जळगाव जिल्ह्यात कांद्यासाठी चोपडा तालुक्‍यातील अडावद, धानोरा, पंचक, खर्डी, वर्डी, मंगरूळ, लासूर, चौगाव भाग प्रसिद्ध आहे. या भागात जलसंकट आहे. कूपनलिका आटल्या असून, आतापासूनच पिकांचे सिंचन करणे अशक्‍य झाले आहे. चोपडा तालुक्‍यात फक्त तापी काठावर पाणीसाठे मुबलक आहेत. यावल तालुक्‍यात किनगाव, डांभुर्णी, साकळी, वढोदा, चिंचोली भाग प्रसिद्ध आहे. या भागात वढोदा व सातपुडा पर्वतालगतच्या भागात कूपनलिकांचे पाणी कमी झाल्याने कांदा लागवड निम्मी कमी होईल, असे चित्र आहे. फक्त डांभुर्णी, किनगाव भागात लागवड बऱ्यापैकी असणार आहे. रावेर तालुक्‍यात कांदा लागवड फारशी वाढणार नाही. कारण केळी लागवड यंदा रावेरात अधिक होईल. तसेच धरणगाव, पाचोरा, चाळीसगाव, एरंडोल या भागातही जलसाठे कमी झाले आहेत. फक्त गिरणाकाठी जलसाठे सध्या टिकून आहेत. चाळीसगाव तालुक्‍यात कांदा लागवड कमी होईल. कारण या भागात रोपवाटिका मागील वर्षाच्या तुलनेत कमी आहेत.

धुळे जिल्ह्यात शिरपूर, धुळे, शिंदखेडा व साक्री या भागात कांदा लागवड केली जाते. धुळे तालुक्‍यातील कापडणे, न्याहळोद, लामकानी, जापी, कौठळ भागात जलसंकट आहे. अर्धा तासही विहिरी चालत नाहीत. फक्त नेर, कुसुंबा भागात स्थिती बरी आहे. साक्री तालुक्‍यातील पिंपळनेरात लागवड बऱ्यापैकी होईल. परंतु इतर भागात जलसंकट आहे. शिंदखेडा तालुक्‍यात चिचवार, विखरण भागात कांदा लागवड अत्यल्प आहे. पुढे लागवडच होणार नाही, अशी स्थिती आहे. फक्त शिरपुरातील तापीकाठावरील गावांमध्ये कांदा लागवड होईल. नंदुरबारात उन्हाळ कांदा लागवड तळोदा, शहादा व नंदुरबारात काही ठिकाणी केली जाते. परंतु यंदा नंदुरबार व शहादा तालुक्‍यांचा पूर्व भाग आवर्षणग्रस्त असल्याने कांदा लागवड जिल्ह्यात ५०० हेक्‍टरदेखील होणार नाही, असे सांगितले जात आहे.