नाशिकमध्ये सर्वांत कमी तापमानाची नोंद

पुणे ः राज्यात किमान तापमानात घट होत असून, थंडीत हळूहळू वाढ होऊ लागली आहे. रविवारी (ता. २७) सकाळी आठ वाजेपर्यंत नाशिकमध्ये सर्वांत कमी म्हणजेच १३.८ अंश सेल्सिअसची किमान तापमानाची नोंद झाली असल्याचे हवामान विभागाच्या सूत्रांनी सांगितले. बंगालच्या उपसागरात कमी दाबाचा पट्टा तयार झाला आहे. या पट्ट्याचे चक्राकार वाऱ्यामध्ये रूपांतर होऊन हे वारे बंगालच्या उपसागराकडून श्रीलंका, तमिळनाडू आणि केरळच्या दिशेने सरकत आहे. तसेच केरळ आणि लक्षद्वीपकडून चक्राकार वारे कर्नाटकाच्या दिशेने सरकत आहे. तर कोकणाच्या दक्षिण भागात हवेचा कमी दाबाचा पट्टा असून, त्याचे चक्राकार वाऱ्यामध्ये रूपांतर होण्याची शक्यता आहे. त्यामुळे कोकण, मध्य महाराष्ट्र आणि कर्नाटकाच्या काही भागांत हवामान ढगाळ आहे. मध्य महाराष्ट्रात व मराठवाड्यात तुरळक ठिकाणी हलका पाऊस रविवारी सकाळी आठ वाजेपर्यंत पडला. पुणे परिसरातही शनिवार (ता.४) पर्यंत आकाश अंशतः ढगाळ राहील. सध्या राज्यातील कमाल आणि किमान तापमानात चढ- उतार होत आहे. कोकण, विदर्भाच्या काही भागांत कमाल तापमानात सरासरीच्या तुलनेत लक्षणीय वाढ झाली आहे. सांताक्रूझमध्ये कमाल तापमानात सरासरीच्या ३५.६ अंश सेल्सिअसची नोंद झाली. त्यापाठोपाठ विदर्भातील अकोला येथे कमाल तापमानात सरासरीच्या तुलनेत २.५ अंश सेल्सिअसने घट होऊन ३५.१ अंश सेल्सिअस तापमान होते. परभणीतील किमान तापमानात सरासरीच्या तुलनेत २.८ अंशांने घट होऊन १५.९ अंश सेल्सिअसची नोंद झाली. तर जळगाव, नाशिक, सोलापूर, नागपूर, अकोला येथील तापमानातही घट झाली. कोल्हापुरातील किमान तापमानात तीन अंशाने वाढ होऊन किमान तापमान २२.६ अंश सेल्सिअस होते. पुणे, मुंबई, रत्नागिरी, सातारा, सांगली, मालेगाव येथील किमान तापमानातही सरासरीच्या तुलनेत एक ते दोन अंशांनी वाढ झाली. रविवारी (ता.२९) सकाळी आठ वाजेपर्यंतचे कमाल, कंसात किमान तापमान ः (अंशसेल्सिअस) :  मुंबई ३३.५ (२५.०), सांताक्रूझ ३५.६ (२२.७), अलिबाग ३२.९ (२२.८), रत्नागिरी ३४.८ (२४.६), डहाणू ३३.० (२१.०), पुणे ३१.१ (१८.०), नगर ३५.५, जळगाव ३४.० (१४.४), कोल्हापूर ३०.२ (२२.६), महाबळेश्वर २५.९ (१६.४), मालेगाव ३२.२, नाशिक ३१.४ (१३.८), सांगली ३२.० (२१.०), सातारा ३०.६ (१९.७), सोलापूर ३४.१ (१८.८), उस्माबाद ३०.३ (१५.४), औरंगाबाद ३३.४ (१६.०), परभणी ३३.८ (१५.९), नांदेड ३४.५ (१८.०), अकोला ३५.१ (१७.५), अमरावती ३१.६ (१७.४), बुलडाणा ३१.५ (१७.४), ब्रह्मपुरी ३४.२ (१८.३), चंद्रपूर ३१.८ (२१.०), गोंदिया ३२.२ (१७.३), नागपूर ३३.३ (१७.०), वर्धा ३२.५ (१७.५), यवतमाळ ३२.५ (१६.०)