महिला कर्मचाऱ्यांऐवजी कुटुबीयांचाच हस्तक्षेप !

अमरावती : सरपंच पतीप्रमाणे कृषी विभागातदेखील महिला कर्मचाऱ्यांच्या पतींचा कार्यालयीन कामात हस्तक्षेप वाढल्याने त्यावर नियंत्रणासाठी थेट प्रशासकीय कारवाईचेच आदेश कृषी सहसंचालकांना काढावे लागले. अकोट येथे कृषी सहायक महिलेचा पती लाचखोरीत पकडल्यानंतर हे आदेश काढण्यात आले.  जलयुक्‍त शिवारच्या कंत्राटदाराची देयक काढण्यासाठी एक लाख १८ हजार रुपयांची लाच घेण्यात आली होती. याप्रकरणी अकोट (जि. अकोला) येथील तालुका कृषी अधिकारी मंगेश ठाकरे, कृषी सहायक वनमाला भास्कर तसेच वनमालाचा पती सुरत्ने या तिघांना अटक करण्यात आली. कृषी सहायक महिलेच्या पतीमार्फत हा पैशाचा व्यवहार झाला. त्यामुळे महिला कर्मचाऱ्यांच्या पतीचा कार्यालयीन कामात हस्तक्षेप वाढीस लागल्याची बाब चव्हाट्यावर आली. त्याची दखल घेत अमरावती विभागीय कृषी सहसंचालक सुभाष नागरे यांनी कृषी विभागाच्या कामात महिला कर्मचाऱ्यांचे पती किंवा त्यांच्या कुटुंबीयांचा हस्तक्षेप झाल्यास संबंधित महिला कर्मचाऱ्यावर तीव्र प्रशासकीय कारवाईचे आदेश दिले आहेत.   महिला कृषी सहायकांनीदेखील नियमाप्रमाणे नेमणूक दिलेल्या मुख्यालयी राहणे गरजेचे आहे. ग्रामस्तरावर त्यांच्याद्वारे कृषी योजनांविषयी मार्गदर्शनही अपेक्षित आहे. परंतु, तसे न करता त्यांच्याऐवजी त्यांचे पती किंवा कुटुंबातील इतर सदस्यच हे काम करीत असल्याची बाब निदर्शनास आल्याचे या आदेशात म्हटले आहे. यापुढे महिला कर्मचाऱ्यांचे कुटुंबातील प्रतिनिधी शासकीय योजना राबविताना आढळल्यास तत्काळ पर्यवेक्षकीय अधिकारी व संबंधित कर्मचाऱ्यांवर महाराष्ट्र नागरी सेवा (वर्तणूक) निम १९७९ अन्वये शिस्तभंगविषयक कारवाई करण्याचा इशाराही विभागीय कृषी सहसंचालकांनी आदेशातून दिला आहे. 

चार महिलांची झाली तक्रार विभागीय कृषी सहसंचालकांनी महिला कर्मचाऱ्यांसंदर्भाने कारवाईचा आदेश काढल्यानंतर अवघ्या आठ दिवसांतच चार तक्रारी कृषी सहसंचालक कार्यालयाकडे प्राप्त झाल्या. महिला कर्मचाऱ्यांऐवजी त्यांचे पती किंवा कुटुंबीयच कृषी विभागाच्या दैनंदिन कामात हस्तक्षेप करीत असल्याचे यात म्हटले आहे. विशेष म्हणजे संबंधित कार्यालयाच्या प्रमुखांकडूनच या तक्रारी करण्यात आल्या असून त्याची चौकशीदेखील विभागीय कृषी सहसंचालकस्तरावरून होत आहे. चौकशीअंती या चारही प्रकरणात शिस्तभंगाची कारवाई करण्यात येणार असल्याचे सूत्रांकडून सांगण्यात आले. विभागीय कृषी सहसंचालकांनी घेतलेल्या या पुढाकाराचे कर्मचाऱ्यांकडून स्वागत होत आहे.