अकोला ः पीकउत्पादन वाढीसाठी शाश्वत पाणीस्रोत तसेच दुष्काळावर मात करण्यासाठी शेततळे उपयुक्त ठरते. हे ध्यानात घेत ‘मागेल त्याला शेततळे’ योजना सुरू करण्यात अाली. जिल्ह्याला असलेला साडेतीन हजार शेततळ्यांचा लक्ष्यांक आतापर्यंत केवळ ३० ते ३५ टक्के पूर्ण झाला अाहे. या योजनेतून १०३२ शेततळ्यांची कामे पूर्ण झाल्याची माहिती समोर अाली अाहे.
टंचाईग्रस्त भागात ही योजना प्रामुख्याने राबवली जाते. योजनेअंतर्गत ३० बाय ३० बाय ३ मीटर अाणि १५ बाय १५ बाय ३ मीटर आकारमानाचे शेततळे दिले जाते. ३० बाय ३० बाय ३ मीटर शेततळ्यासाठी ५० हजार रुपये अनुदान दिले जाते, तर इतर खर्च शेतकऱ्यांनी करायचा अाहे. शेततळे योजनेचा लाभ घेण्यासाठी अर्ज अाॅनलाइन पद्धतीने मागवण्यात अाले.
जिल्ह्याला ३५०० शेततळ्यांचा लक्ष्यांक होता. मात्र यासाठी ४६९२ अर्ज अाले होते. त्यापैकी ३३९० अर्ज पात्र ठरले. तालुकास्तरीय समितीने ३३४८ अर्जांना मंजुरी दिली. त्यानंतर २९६२ शेततळ्यांना कार्यारंभ अादेश देण्यात अाले. अद्याप पर्यंत १०३२ शेततळी पूर्ण झाली आहेत. १६८ शेततळ्यांची कामे सुरू अाहेत.
शासन देत असलेल्या अनुदानात शेततळे खोदणे शक्य नसल्याने शेतकऱ्यांचा फारसा उत्साह राहलेला नाही. यंत्रणांना सातत्याने पाठपुरावा करून कामे पुर्णत्वास न्यावी लागत अाहेत. अनुदान कमी पडत असल्याने तसेच शेतकऱ्यांना खोदकामाबाबत तितकीशी माहिती नसल्याचा समज करून घेत काही ठिकाणी शेततळ्याचा अाकार कमी करून खोदले जात अाहे. ३० बाय ३० बाय ३ मीटर एेवजी २५ बाय २५ बाय ३ मीटर अाकाराचे शेततळे खोदले जात असून, देयक मात्र पूर्ण अाकाराच्या शेततळ्याचे काढले जात असल्याची चर्चा कृषी यंत्रणेत एेकायला मिळते, अशी कामे करणारी यंत्रणा खालपासून वरपर्यंत सर्व मॅनेज करीत असल्याचेही बोलले जाते.
