शेतकरी कंपन्या करणार नाफेडसाठी कांदा खरेदी

पुणे ः कांद्याचे घसरत चाललेले दर व बाजारात स्थिरता आणण्याच्या दृष्टीने केंद्र शासनाने नाफेडला महाराष्ट्रात २५,००० टन कांदा खरेदीला परवानगी दिलेली आहे. यासाठी शेतकरी उत्पादक कंपन्यांच्या वतीने महा-एफपीसीने १५,००० टन खरेदीचा प्रस्ताव नाफेडकडे पाठविला होता. याला नाफेडने हिरवा कंदील दिला असून, साधारणपणे एप्रिलच्या दुसऱ्या आठवडाभरात हे काम सुरू होणार आहे, अशी माहिती महा-एफपीसीचे अध्यक्ष व व्यवस्थापकीय संचालक योगेश थोरात यांनी दिली. शेतकरी उत्पादक या थेट गावपातळीवर कांद्याची खरेदी करणार आहेत. ही खरेदी बाजारभावानुसार होईल. यासाठी शेतकरी उत्पादक कंपनीच्या परिसरातील कृषी उत्पन्न बाजार समितीमधील बाजारभाव पायाभूत मानण्यात येतील. बाजारभावाने थेट बांधावर खरेदी होणार असल्याने शेतकऱ्यांचा कांदा बाजारपेठेत नेण्याच्या खर्चाबरोबरच बाजारामधील इतर खर्चदेखील वाचणार आहे. त्यामुळे शेतकऱ्यांना अधिकचा फायदा होणार आहे. थेट शेतकरी सामुदायिक सुविधा केंद्रांकडे उपलब्ध असणाऱ्या चाळी किंवा भाडेतत्त्वावरील चाळी यामध्ये या कांद्याची साधारणपणे ३-६ महिन्यांसाठी साठवणूक होणार आहे. तसेच क्लस्टर स्तरावर एकत्रित ठिकाणी साठवणूक करण्यासाठी नाशिकमधील व्यापाऱ्यांच्या धर्तीवर ‘तात्पुरती साठवणूक व्यवस्था’ करण्याबाबत महाएफपीसीकडून चाचपणी सुरू आहे. खरेदी केलेला कांदा प्रामुख्याने दिल्लीमध्ये पाठविला जाणार आहे. कांदा खरेदीपासून त्याची साठवणूक करणे तसेच विक्रीसाठी बॅग भरण्याची जबाबदारी शेतकरी उत्पादक कंपनीची असणार आहे. यासाठी महाएफपीसीच्या सभासद संस्थांबरोबरच कांदा पिकात काम करणाऱ्या शेतकरी उत्पादक कंपन्यांनी महाएफपीसीशी संपर्क साधावा. तसेच शेतकऱ्यांनी आपल्या परिसरामधील शेतकरी उत्पादक कंपनीशी संपर्क साधावा. (संपर्क ः अक्षय ९४०५४३१७१५)