शेतकरी कंपन्यांच्या संचालकांचा आत्मदहनाचा प्रयत्न

अकोला : शेतकरी कंपन्यांचे बीजोत्पादन व वितरणाचे थकलेले अनुदान देण्यास शासनाने नकार दिल्याने आर्थिक अडचणीत सापडलेल्या या कंपन्यांच्या संचालकांनी शनिवारी (ता.३१) कृषिमंत्री पांडुरंग फुंडकर यांच्या निवासस्थानासमोर आत्मदहनाचा प्रयत्न केला. त्यामुळे पोलिस प्रशासनाची एकच दमछाक झाली. या वेळी पोलिसांनी एकूण ११ जणांना ताब्यात घेतले.  वाशीम जिल्ह्यातील बियाणे उत्पादक शेतकऱ्यांनी सामूहिक आत्मदहनाचा इशारा दिल्याने जिल्ह्यातील पोलिस यंत्रणा कामाला लागली होती. कृषिमंत्री फुंडकर यांच्या खामगाव येथील बंगल्यावर त्यामुळे कडेकोट सुरक्षा व्यवस्था तैनात करण्यात आली होती. या प्रकरणी कृषी विभागाने २९ मार्च रोजी वाशीम येथे जिल्हा अधीक्षक कृषी अधिकारी कार्यालयात बियाणे उत्पादक शेतकऱ्यांची बैठक घेतली. मात्र, या बैठकीत कोणताही ठोस निर्णय न झाल्याने शनिवारी आत्मदहन करण्याच्या निर्णयावर शेतकरी ठाम होते. त्यानुसार शेतकरी उत्पादक कंपन्यांच्या संचालकांनी आत्मदहनाचा प्रयत्न केला. शासनाच्या राष्ट्रीय अन्न सुरक्षा अभियानांतर्गत ग्राम बीजोत्पादन कार्यक्रमांतर्गत बियाणे उत्पादन व वितरण या दोन्ही बाबीसाठी अनुदान दिले जाते. गत गेल्या काही वर्षांपासून बियाणे उत्पादन व वितरण या दोन्ही बाबीसाठी अनुदान शासकीय संस्था, शेतकरी उत्पादक कंपन्या, गट, मंडळांना अनुदान दिले जात होते; परंतु गेल्या हंगामात हे बंद करण्यात आले.  यामुळे वाशीम जिल्ह्यात शेतकरी उत्पादक कंपन्या, गट, मंडळे अडचणीत सापडले आहेत. अनुदान मिळाले नसल्याने उत्पादक गट व कंपनीच्या शेतकऱ्यांनी मुख्यमंत्री व कृषिमंत्र्यांकडे निवेदन देत अनुदानाची मागणी केली आहे. आता तरी अनुदान मिळेल का? वेळोवेळी निवेदने देऊन आणि उपोषणे केल्यानंतरही अनुदान मिळाले नव्हते. त्यामुळे शनिवारी आत्मदहन आंदोलन करण्यात आले. निदान आता तरी शासन हे थकलेले अनुदान देऊन संकटात सापडलेल्या शेतकरी कंपन्या, गटांना यातून बाहेर काढेल का, असा प्रश्‍न उपस्थित करण्यात येत आहे.