शेतकरी धर्मा पाटील यांची विखे, शेट्टींकडून विचारपूस

मुंबई : विरोधी पक्षनेते राधाकृष्ण विखे पाटील यांनी आणि स्वाभिमानी शेतकरी संघटनेचे खासदार राजू शेट्टी यांनी जेजे रुग्णालयात जाऊन मंत्रालयात आत्महत्येचा प्रयत्न करणारे शेतकरी धर्मा पाटील यांच्या प्रकृतीची विचारपूस केली. या वेळी वैद्यकीय अधिकाऱ्यांसह धर्मा पाटील यांचे पुत्र नरेंद्र पाटील उपस्थित होते.

श्री. विखे पाटील म्हणाले, की राज्यातील शेतकऱ्यांना मंत्रालयात येऊन आत्महत्येचा प्रयत्न केल्याशिवाय सरकारला जाग येत नाही, हे मागील अनेक घटनांमधून स्पष्ट झाले आहे. मेक इन महाराष्ट्र आणि मॅग्नेटिक महाराष्ट्राचे धोरण मूठभर धनदांडग्यांचा गल्ला भरणारे आणि शेतकऱ्यांना आत्महत्येसाठी चिथावणी देणारे धोरण आहे. हे सरकार शिवाजी महाराजांचे नाव घेऊन शेतकऱ्यांची फसवणूक करीत आहे.

धुळे जिल्ह्यातील एका मंत्र्याला तो मंत्री असल्याने तत्काळ जमिनीची खातेफोड करून मिळते, पण धर्मा पाटील यांसारख्यांना वशिला अन् राजाश्रय नसलेल्या शेतकऱ्यांना मंत्रालयात येऊन विष घ्यावे लागते, ही परिस्थिती सरकारने राज्यात निर्माण केली आहे. हे सरकार शेतकऱ्यांची कमी पैशात बोळवण करण्याचा प्रयत्न करीत आहे. सरकारी दलालांमार्फत येणाऱ्या शेतकऱ्यांना योग्य किंमत मिळते. पण दलालाच्या तुंबड्या न भरणाऱ्या शेतकऱ्यांवर जीव देण्याची वेळ येते, असेही श्री. विखे पाटील म्हणाले.

खासदार राजू शेट्टी यांनीही रविकांत तुपकर यांच्यासमवेत शेतकरी धर्मा पाटील यांच्या प्रकृतीची विचारपूस केली. राज्यातील शेतकऱ्यांना मंत्रालयात येऊन आत्महत्येचा प्रयत्न केल्याशिवाय सरकारला जाग येत नाही, हे या घटनांमधून स्पष्ट झाले आहे, असे खासदार राजू शेट्टी या वेळी म्हणाले. भ्रष्टाचार, शेतकऱ्यांविषयी अनास्था आणि दलालांची बजबजपुरी यामुळे हे सरकार सामान्य माणसांसाठी काम करत नसल्याचे ठसठशीत उदाहरण समोर आल्याचे खासदार शेट्टी  म्हणाले.

दरम्यान, धर्मा पाटील यांच्या मुलाने सरकारने दिलेली १५ लाख रुपयांची मदत नाकारली आहे. जर सरकारने योग्य मदत दिली नाही तर बापाने मंत्रालयात आत्महत्या करण्याचा प्रयत्न केला, मी दिल्लीत जाऊन आत्महत्या करेन, असा इशाराही नरेंद्र पाटील यांनी दिला आहे.