शेतकरी गोरख घाडगे यांनी नाकारली कर्जमाफी

शेतकरी कर्जमाफी
शेतकरी कर्जमाफी

सोलापूर ः शेतमालाला उत्पादनखर्चावर आधारित हमीभाव द्या, अशी वर्षानुवर्षे मागणी आहे. या प्रश्‍नावर सातत्याने चर्चा होऊनही निर्णय होत नाही, यासारखे शेतीचे अनेक विषय जाणीवपूर्वक प्रलंबित ठेवले जातात. शेतकऱ्यांना एखाद्या विषयात गुंतवून ठेवले जाते, कर्जमाफी हाही असाच प्रकार आहे. यासारख्या उपायांमुळे शेतकऱ्यांचे प्रश्‍न कधीच सुटणार नाहीत, त्याला कायमस्वरूपी आधाराची गरज आहे, असे सांगत सरकारचा निषेध करत सांगोला तालुक्‍यातील शिवणेचे शेतकरी गोरख घाडगे यांनी राज्य सरकारची छत्रपती शिवाजी महाराज शेतकरी सन्मान योजना नाकारली आहे.  मुख्यमंत्री देवेंद्र फडणवीस यांच्यासह जिल्हा बॅंक, महाराष्ट्र बॅंक आणि उपनिबंधकांना यासंबंधीचे निवेदन देऊन ही कर्जमाफी नाकारत असल्याचे निवेदनात म्हटले आहे. श्री. घाडगे यांच्याकडे स्टेट बॅंकेचे दुग्ध व्यवसायासाठी काढलेले ३ लाख ३६ हजार, जिल्हा बॅंकेचे ऊसासाठी घेतलेले १ लाख ६६ आणि १ लाखाचे पीककर्ज आहे. यापैकी एखादे खाते या योजनेतून बेबाकी झाले असते. पण त्यांनी ही कर्जमाफी सपशेल नाकारली.  यासंबंधीच्या निवेदनात श्री. घाडगे म्हणतात, की राज्यात शेतकऱ्यांच्या मालाला उत्पादन खर्चावर भाव ठरवण्यासाठी जी शेतमाल भाव समिती नेमली आहे, त्याला कोणताही संविधानिक आधार नाही. शिवाय या समित्यांकडून शेतकऱ्यांचा उत्पादन खर्च काढला जातो, तो कुठेही जुळत नाही, पण तोच शेतकऱ्यांच्या माथी मारला जातो. वास्तविक, शेतकऱ्यांच्या शेतीमालाला भाव देण्यासाठी घटनेतील राज्य घटना कलम ३२३ (ब) (२ग) नुसार कृषि लवाद नेमून शेतीमालाची दर निश्‍चिती होत नाही तोपर्यंत कितीही कर्जमाफी केल्या, अनुदाने दिली, तरी हा प्रश्‍न सुटू शकणार नाही. त्यामुळे कृषि लवाद नेमून हा प्रश्‍न सोडवणे आवश्‍यक आहे. शेतीचे प्रश्‍न जैसे थे असताना या कर्जमाफीचा लाभ काय कामाचा, असेही श्री. घाडगे यांनी म्हटले आहे.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com