सांगली : छत्रपती शिवाजी महाराज शेतकरी सन्मान योजनेअंतर्गत कर्जमाफी, प्रोत्साहन अनुदान, ओटीएसचा लाभ न मिळालेल्या 21 हजार 900 शेतकऱ्यांच्या माहितीतील त्रुटी, चुकांचा डाटा जिल्हा बॅंकेला प्राप्त झाला आहे. माहितीची शहानिशा करून दुरुस्त माहिती शासनाला सादर होणार आहे.
कर्जमाफी, प्रोत्साहन अनुदान, ओटीएससाठी जिल्ह्यातून 1 लाख 83 हजार शेतकऱ्यांनी (कुटुंबे) ऑनलाइन नोंदणी केली होती. त्यापैकी चार टप्प्यांत शासनाने 87 हजार 523 शेतकऱ्यांना 182 कोटींचा लाभ दिला आहे. यामध्ये 25 हजार 428 शेतकऱ्यांची 90.49 कोटी रुपयांची कर्जमाफी झाली आहे. 62 हजार 95 शेतकऱ्यांना 91.53 कोटींचे प्रोत्साहन अनुदान मिळाले आहे. 26 हजार 494 शेतकऱ्यांना ओटीएस अंतर्गत 188 कोटी रुपयांचा लाभ मिळणार आहे. त्यासाठी त्यांना ता. 31 मार्च 2018 पर्यंत दीड लाखावरील थकबाकीची रक्कम भरावी लागणार आहे. दरम्यान कर्जमाफी योजनेसाठी नोंदणी झालेल्या अर्जातील व बॅंकांकडून सादर झालेल्या माहितीत त्रुटी, चुका आढळल्या आहेत. जिल्ह्यातील 21 हजार 900 शेतकऱ्यांच्या माहितीतील त्रुटी, चुकांचा डाटा शासनाकडून आला आहे.
कर्जमाफीसाठीच्या अर्जात थकबाकीदार आहे का, या रकान्यात आहे असे नमूद आहे, पण थकबाकीच्या रकमेच्या रकान्यात शून्य असे नमूद असणे अथवा थकबाकादीर नाही असे नमूद असताना थकबाकीची रक्कम नमूद असणे, कर्जमाफी योजनेचा लाभ 2009 ते 2016 पर्यंतच्या थकीत कर्जाला असताना या तारखेपूर्वीच्या काही तारखांच्या कर्जाचा उल्लेख असणे, थकबाकीची तारीख चुकीची असणे आदी चुका आहेत. माहिती व तारीख चुकीची आहे की कर्जमाफीस अपात्र आहे, याबाबतची शहानिशा केली जाणार आहे. आवश्‍यकतेनुसार दुरुस्ती करून या 21 हजार 900 शेतकऱ्यांची माहिती शासनाला ऑनलाइन पाठविली जाणार आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.