मराठवाड्यात दीड लाखापर्यंत अकरा लाख थकबाकीदार

औरंगाबाद : राज्य सरकारच्या छत्रपती शिवाजी महाराज शेतकरी सन्मान योजनेसाठी दिलेल्या पात्रतेच्या कालावधीत राज्यातील तब्बल 36 लाख 10 हजार 216 शेतकऱ्यांकडे दीड लाखापर्यंतचे कर्ज थकीत असल्याची माहिती समोर आली आहे. यामध्ये मराठवाड्यातील 10 लाख 83 हजार 932 शेतकऱ्यांचा समावेश आहे.

राज्यभरातील शेतकऱ्यांना कर्जमाफीसाठी अर्ज करण्याच्या मुदतीत 22 सप्टेबंरपर्यंत मुदतवाढ दिली गेली. या मुदतीनुसार 18 सप्टेंबरपर्यंत राज्यभरातून 99 लाख 80 हजार 743 शेतकऱ्यांनी कर्जमाफीसाठी नोंदणी केली. तर 53 लाख 39 हजार 7 अर्ज आले. त्यामध्ये मराठवाड्यातील आठही जिल्ह्यांमधून आलेल्या 30 लाख 403 शेतकऱ्यांच्या नोंदणीसह 15 लाख 89 हजार 784 अर्जांचा समावेश असल्याची माहिती सूत्रांनी दिली.

दीड लाखापेक्षा जास्त कर्ज थकीत असलेल्या राज्यातील 8 लाख 38 हजार 383 शेतकऱ्यांमध्ये मराठवाड्यातील 1 लाख 56 हजार 133 शेतकऱ्यांचा समावेश असल्याची माहिती समोर आली आहे. शेतकऱ्यांच्या कर्जमाफीचा मुद्‌दा ऐरणीवर आल्यानंतर शासनाने तत्त्वत: कर्जमाफीला मान्यता देऊन काही निकषांच्या आधारे शेतकऱ्यांना कर्जमाफीसाठी ऑनलाइन अर्ज करण्यास सांगीतले.

त्या ऑनलाइन कर्जमाफी अर्जासाठी पीक विम्याप्रमाणेच शेतकऱ्यांना रांगा लावाव्या लागल्या. आता कर्जमाफी योजनेसाठी अर्ज भरण्याच्या मुदतीला दोन दिवसांचा अवधी उरला आहे. दुसरीकडे प्रशासकीय यंत्रणेकडूनही योजनेच्या प्रगतीचा आढावा घेण्याचे काम सुरू आहे. 18 सप्टेंबरपर्यंतच्या आकडेवारीनुसार मराठवाड्यातील 10 लाख 83 हजार 932 शेतकऱ्यांकडे दीड लाखापर्यंतचे कर्ज थकीत आहे.

तर 1 लाख 56 हजार 133 शेतकऱ्यांकडे दीड लाखापेक्षा जास्त कर्ज थकीत आहे. त्यामध्ये सर्वाधिक शेतकरी थकीत कर्जदार शेतकरी जालना जिल्ह्यातील असून त्यापाठोपाठ बीड, परभणी, नांदेड, औरंगाबाद, लातूर, उस्मानाबाद व हिंगोली जिल्ह्यातील दोन्ही प्रकारांतील थकीत कर्जदार शेतकऱ्यांचा समावेश असल्याची माहिती सहकार विभागाच्या सूत्रांनी दिली.