शेतकरी उत्पादक कंपन्या सुरू करणार डाळ मिल

परभणी : महाराष्ट्र स्पर्धाक्षम कृषी विकास प्रकल्पांतर्गत जिल्ह्यात स्थापन करण्यात आलेल्या चार शेतकरी उत्पादक कंपन्या वाढीव व्यवसाय आराखड्यानुसार डाळ मिल सुरू करणार आहेत.

महाराष्ट्र स्पर्धाक्षम कृषी विकास प्रकल्पांतर्गत जिल्ह्यात १२ शेतकरी उत्पादक कंपन्यांची स्थापना करण्यात आली आहे. या सर्व कंपन्या धान्याची क्लिनिक ग्रेडिंग, पॅकिंग करून विक्री करणाऱ्या आहेत. यापैकी चार शेतकरी उत्पादक कंपन्यांचे व्यवसाय आराखडे १८ लाख रुपयांचे आणि आठ शेतकरी उत्पादक कंपन्यांचे व्यवसाय आराखडे प्रत्येकी १० लाख रुपयांचे होते.

यापैकी बोरी (ता. जिंतूर) येथील आचार्य भास्करभट्ट प्रोड्यूसर कंपनी, वर्णा (ता. जिंतूर) येथील वर्णेश्वर शेतकरी उत्पादक कंपनी, धारासूर (ता. गंगाखेड) येथील धारासूर अॅग्रो प्रोड्यूसर कंपनी, देऊळगाव (ता. सेलू) येथील चंद्रबेट अॅग्रो प्रोड्यूसर कंपनी या चार शेतकरी उत्पादक कंपन्यांचे सुरवातीचे व्यवसाय आराखडे १० लाख रुपयांचे होते. त्यानंतर ८ लाख रुपयांचे डाळ मिल उभारणीचे वाढीव व्यवसाय आराखडे मंजूर करण्यात आले आहेत.

आराखड्यामध्ये शेतकरी कंपनीचा वाटा ४ लाख ५० हजार रुपये आहे. १३ लाख ५० हजार रुपये शासकीय अनुदान यांचा समावेश आहे. लोकवाटा भरल्यानंतर या शेतकऱ्यांना प्रत्येकी ११ लाख ५० हजार रुपये अनुदान वितरित करण्यात आले आहे.

या कंपन्यांनी डाळ मिलच्या उभारणीसाठी आवश्यक यंत्रसामग्री खरेदी केली आहे. उर्वरित २ लाख रुपयांचे अनुदान डाळ मिलची उभारणी करून प्रत्यक्षात कार्यान्वित झाल्यानंतर वितरित केले जाणार आहे. गतवर्षी शेतकरी उत्पादक कंपन्यांनी आधारभूत किंमत दराने तूर खरेदी केली होती. शेतकऱ्यांच्या कंपन्यांनी डाळ मिल सुरू केल्यानंतर तूर, मूग, उडीद आदी कडधान्यांचे मूल्यवर्धन होणार असून, त्यामुळे शेतकरी उत्पादक कंपन्यांतर्गत सभासद शेतकऱ्यांना फायदा होणार आहे, असे महाराष्ट्र स्पर्धाक्षम कृषी विकास प्रकल्पाच्या सूत्रांनी सांगितले.