ऊस बिलावरून शेतकरी आक्रमक

नाशिक  : वसंतदादा सहकारी साखर कारखाना संचालित धाराशीव कारखाना प्रशासनाने ऊस उत्पादकांना अध्यापही एफआरपीची रक्कम दिलेली नाही. त्यामुळे संतप्त शेतकरी वसाका कारखाना कार्यस्थळावर धडकले. मात्र येथील कारखान्याचे प्रशासकीय अधिकारी उपस्थित नसल्याने ते तहसील कार्यालयात असल्याचे समजल्यानंतर थेट ते कार्यालय गाठले. या ठिकाणी ठिय्या मांडून कारखान्याच्या प्रशासकीय मंडळाला तहसील कार्यालयात जाब विचारला. या वेळी संतप्त ऊस उत्पादक शेतकरी व कारखाना प्रशासनात बाचाबाची झाली.

ऊस उत्पादकांनी ऊस बिल व वजन पावत्या, एकूण पुरवठा केलेल्या उसाचा हिशेब मागितला. कारखान्याच्या प्रशासनाकडून समाधानकारक उत्तर न मिळाल्याने तहसीलदारांसमोरच दोघांमध्ये बाचाबाची झाली. बिलमिळण्याबाबत घोषणाबाजी झाल्यामुळे तहसील कार्यालयात काही काळ तणाव निर्माण झाला. तहसीलदार शेजूळ यांनी ठरलेल्या एफआरपीप्रमाणे पेंमेट अदा करणार असल्याचे सांगितले. 

ऊस उत्पादक संघर्ष समितीचे अध्यक्ष प्रभाकर पाटील म्हणाले,  ‘‘कादवा कारखान्याने २६००, तर द्वारकादीश कारखान्याने २३७० रुपये प्रतिटन भाव दिला. मात्र या कारखान्याने १८८५ रुपयाने एफआरपीचे गाजर दाखवून ऊस उत्पादकांची फसवणूक केली. येत्या सात दिवसांत संपूर्ण ऊस बिलाचा हिशेब, वजन पावत्या व काटा पेंमेंटचा हिशेब न दिल्यास जिल्हा अधिकारी व साखर आयुक्त कार्यालयासमोर उपोषण करण्यात येईल.‘‘ या घोषणेला स्वाभिमानी शेतकरी संघटनेचे जिल्हाध्यक्ष गोविंद पगार, प्रहार शेतकरी संघटनेचे तालुकाध्यक्ष विनोद आहेर आदींनी पाठिंबा दिला. 

समितीचे व स्वाभिमानी शेतकरी संघटनेचे सदस्य कुबेर जाधव, देवळा शिवसेना तालुकाप्रमुख सुनील पवार, कळवण तालुका स्वाभिमानी तालुका अध्यक्ष रामकृष्ण जाधव, वसंतराव पाटील, कैलास शिंदे, देवळा तालुका अध्यक्ष रवींद्र शेवाळे, सुरेश पाटील, शशिकांत निकम, विलास पाटील सह निफाड, नवापूर, शिरपूर भागातील ऊस उत्पादक उपस्थित होते.