अमरावतीत ‘एसडीओ’ कार्यालयात फेकली तूर

अमरावती : प्रतीकात्मक खरेदी करून ही तूर नंतर उपविभागीय अधिकाऱ्यांच्या टेबलवर फेकत सातबारा शेतकरी संघर्ष समितीच्या वतीने अभिनव पद्धतीने तूर खरेदी बंदप्रकरणी शासनाचा निषेध करण्यात आला.  हमीभावाने तूर खरेदीसाठी सरकारकडून ऑनलाइन नोंदणी करण्यास सांगण्यात  आले. त्यानुसार हजारावर शेतकऱ्यांनी नोंदणी केली. काही शेतकऱ्यांकडील तूर खरेदी केल्यानंतर १८ एप्रिलपासन तूर खरेदी बंद करण्यात आली. शिल्लक आणि ऑनलाइन नोंदणी केलेल्या शेतकऱ्यांकडील तूर खरेदीचे काय? असा प्रश्‍न उपस्थित केला जात आहे. याचा विरोध करीत सातबारा शेतकरी संघर्ष समितीच्या वतीने पंतप्रधान आणि मुख्यमंत्री यांच्या नावाने प्रतिकात्मक तूर खरेदी केंद्र सुरू करण्यात आले. या ठिकाणी तूर आणलेल्या शेतकऱ्यांच्या तुरीचे वजन केले गेले. त्यानंतर ही तूर उपविभागीय अधिकारी यांच्या कक्षातील टेबलवर फेकून देत शासनाचा निषेध करण्यात आला.  बोंड अळीग्रस्तांना तत्काळ मदतीचे वाटप, हरभरा खरेदीची गती वाढवावी, रोजगार हमी योजनेतील कामाचे अनुदान मिळावे, कर्जमाफी प्रक्रिया गतीमान करावी, अशा मागण्याही या वेळी करण्यात आल्या. कर्जमाफीपासून अद्यापही ७० टक्‍के शेतकरी वंचित असल्याने शासनाच्या हेतूवरच या वेळी शंका व्यक्‍त केली गेली. प्रकाश साबळे यांच्या नेतृत्वातील या आंदोलनात हरिभाऊ मोहोड, भागवत खांडे, राहूल तायडे, किशोर चांगोले, गोपाल महल्ले, वीरेंद्रसिंह जाधव, मंगेश देशमुख, प्रभाकर भुसारी, गणेश कडू यांच्यासह शेतकरी सहभागी झाले होते.