बुलडाण्यात प्रहार संघटनेचे आंदोलन

बुलडाणा (प्रतिनिधी) ः शेतकऱ्यांची सरसकट कर्जमाफी करुन सातबारा कोरा करावा, बोंड अळीने नुकसान झालेल्या कापूस उत्पादक शेतकऱ्यांना एकरी 25 हजार रुपयांची मदत देण्यात यावी, या व इतर मागण्यांसाठी प्रहार संघटनेच्या जनशक्ती पक्षाने गुरुवारी (ता. 7) जिल्हाधिकारी कार्यालयासमोर सातबारा कोरा करा आंदोलन केले.

जिल्हाधिकारी कार्यालयासमोर जमलेल्या शेतकऱ्यांसह शेकडो प्रहार कार्यकर्त्यांनी शासन विरोधी घोषणाबाजी करत आपला रोष व्यक्त केला. प्रहार जनशक्ती पक्षाच्या वतीने संस्थापक अध्यक्ष आमदार बच्चू कडू यांच्या आदेशानुसार राज्यभरात सातबारा कोरा करा, हे आंदोलन करण्यात आले.

त्या अनुषंगाने बुलडाणा जिल्ह्यातही प्रहार जनशक्ती पक्षाचे जिल्हाप्रमुख वैभवराजे मोहिते यांच्या नेतृत्वात उपजिल्हाप्रमुख नीलेश गुजर, अजय टप, प्रहार विद्यार्थी संघटनेचे अक्षय राऊत, बुलडाणा तालुकाप्रमुख प्रदीप टाकसाळ, मलकापूर तालुका प्रमुख पंकज जंगले, नांदुरा तालुकाप्रमुख रामेश्वर काटे यांच्यासह कार्यकर्त्यांनी जिल्हा कचेरीवर धडक दिली. या वेळी शासनविरोधी घोषणाबाजी करीत तब्बल तासभर निदर्शने करण्यात आली.

तसेच शेतकऱ्यांची सरसकट कर्जमाफी करून सातबारा कोरा करण्यात यावा, बोंड अळीने उद्‌ध्वस्त कापूस उत्पादक शेतकऱ्यांना विनाअट एकरी 25 हजार मदत देण्यात यावी, संत्रा उत्पादक शेतकऱ्यांना हेक्‍टरी एक लाख रुपये अनुदान देण्यात यावे, शेतकऱ्यांच्या कृषिपंपाचे वीजबिल माफ करून 24 तास वीजपुरवठा देण्यात यावा, सोयाबीन, तूर उत्पादक शेतकऱ्यांना हेक्‍टरी 25 हजार रुपये अनुदान देण्यात यावे, स्वामिनाथन आयोग लागू करण्यात यावा, पेरणी ते कापणीच्या कामाचा मनरेगात समावेश करण्यात यावा, शेतमालाला आधारभूत भाव द्यावा, कांद्यावरील निर्यातबंदी उठवण्यात यावी, शेतकऱ्यांच्या शेतमालाला हमीभाव देण्यात यावा आदी मागण्यांचे निवेदन अप्पर जिल्हाधिकाऱ्यांना देण्यात आला.

या वेळी शेषराव सोनुने, समाधान जाधव, रामेश्वर ठाकरे, आशिष उबाळे, स्वप्नील साखळे, सुनील उगले, प्रवीण चाटे, विष्णू देवकर, राहुल लोखंडे, विकास दांडगे यांच्यासह शेकडो कार्यकर्ते व शेतकरी सहभागी झाले होते.