नुकसानभरपाईसाठी शेतकऱ्यांचा रास्ता रोको

नागपूर ः गारपीट, वादळ तसेच पावसामुळे झालेल्या नुकसानीची भरपाई मिळावी, याकरिता शेतकऱ्यांनी नागपूर-मुंबई मार्गावरील खापरी बोरोकार येथे मंगळवारी (ता. १३) रास्ता रोको केला. प्रशासनाकडून प्रतिसाद मिळत नसल्याचे पाहून संतप्त शेतकऱ्यांनी अखेरीस रस्त्यावर टायर जाळत सरकारचा निषेध केला.  दरम्यान, शेतकऱ्यांच्या या आंदोलनात आमदार आशिष देशमुख यांनी सहभागी होत आपले समर्थन दिले. सोमवारी (ता.१२) सायंकाळी खापरी बोरोकारसह अनेक गावांमध्ये झालेल्या गारपिटीमुळे संत्रा उत्पादकांचे मोठे नुकसान झाले. गहू झोपला त्यासोबतच सोंगून ठेवलेल्या हरभरा पिकालादेखील फटका बसला. या नुकसानीपोटी मिळणारी मदत कर्जमाफीप्रमाणे ठरू नये, अशी मागणी शेतकऱ्यांची होती. तत्काळ पंचनामे करून मदत मिळावी, यासाठी शेकडो शेतकरी रस्त्यावर उतरले. संतप्त शेतकऱ्यांनी नागपूर-मुंबई मार्गावर रास्ता रोको केला. शेतकऱ्यांच्या या आंदोलनाची प्रशासनाकडून दखल घेतली जात नसल्याने संतप्त शेतकऱ्यांनी त्यानंतर रस्त्यावर टायर जाळत निषेध केला. पोलिसांना माहिती मिळाल्यानंतर त्यांनी घटनास्थळ गाठले. परंतु आंदोलनकर्ते त्यांना जुमानत नव्हते. 

कारंजा तालुक्‍यातही आंदोलन वर्धा जिल्ह्याच्या कारंजा तालुक्‍यातील हेटीकुंडी फाट्यावर सकाळी शेतकऱ्यांनी रास्ता रोको केला. या वेळी शिवसेना खासदार आनंदराव आडसूळ यांनी शेतकऱ्यांशी संवाद साधला. सरकारने एका महिन्याच्या आत गारपीटग्रस्तांना मदत दिली नाही, तर तीव्र आंदोलन करण्याचा इशारा त्यांनी दिला.  पालकमंत्र्यांनी केली पाहणी नागपूरचे पालकमंत्री चंद्रशेखर बावनकुळे यांनी नागपूर जिल्ह्यातील अनेक गारपीटग्रस्त गावांना भेटी दिल्या. या वेळी त्यांनी सर्वेक्षण व पंचनामे करून तत्काळ मदतीचे प्रस्ताव सादर करण्यात सांगितले.