पुणे जिल्ह्यात शेतकरी संपाला संमिश्र प्रतिसाद

पुणे : विविध मागण्यांसाठी पुणे जिल्ह्यातील शेतकऱ्यांनी शुक्रवारपासून (ता. १) दहा दिवस संपावर जाण्याचा निर्णय घेतला आहे. राष्ट्रीय किसान महासंघाने केलेल्या घोषणेप्रमाणे शेतकरी संपावर जात आहेत. या दहा दिवसांच्या कालावधीत शेतकरी आपला कोणताही शेतीमाल विक्री करणार नाहीत. त्यानुसार शुक्रवारी (ता. १) जिल्ह्यातील ठिकठिकाणी दूध आणि भाजीपाल्याच्या गाड्या अडवण्यात आल्या होत्या. पहिल्या दिवशी (ता. १) या संपाला जिल्ह्यातून संमिश्र प्रतिसाद मिळाला.

पुणे जिल्हाधिकारी कार्यालयावरही किसान सभेच्या वतीने निषेध म्हणून आंदोलन करण्यात आले होते. आंदोलनानंतर जिल्हाधिकारी नवलकिशोर राम यांना मागण्यांबाबत निवेदन देण्यात आले होते. भोर तालुक्यातील खेड शिवापूर टोल नाक्यावर हजारो लिटर दूध रस्त्यावर टाकून सरकारचा निषेध करण्यात आला.या वेळी राष्ट्रीय किसान महासंघाच्या कार्यकर्त्यांनी शेतकरी संपाचा भाग म्हणून रात्री अडीच वाजण्याच्या सुमारास टँकरमधून दूध सोडून दिले. त्यामुळे संपूर्ण रस्त्यावर दूध वाहत होते.

आंबेगाव तालुक्यातील घोडेगाव येथील तहसील कार्यालयासमोर किसान सभेच्या वतीने टाळकुटा आंदोलन झाले. यावेळी आंदोलक शेतकऱ्यांनी भजने गाऊन शासनाचा निषेध केला. या वेळी किसान सभेचे अशोक पेकारी, राजू घोडे, अशोक जोशी, लक्ष्मण मावळे, दत्ता गिरंगे, सुनील पेकारी आदी कार्यकर्ते उपस्थित होते. आंदोलन संपल्यानंतर तहसीलदारांना शेतकऱ्यांच्या मागण्यांचे निवेदन दिले. त्यानंतर राष्ट्रवादी काँग्रेसच्या वतीनेही आंदोलन करण्यात आले होते. 

जुन्नर तालुक्यातही किसान सभेच्या वतीने तहसील कार्यालयासमोर निदर्शने करण्यात आली. या वेळी तहसीलदारांना मागण्यांबाबत निवेदन देण्यात आले. या वेळी संघटनेचे डाॅ. मंगेश मांडवे, लक्ष्मण जोशी, विश्वनाथ निगळे आदी उपस्थित होते.