नांदेडमध्ये ऊस बिलासाठी शेतकऱ्यांचा ठिय्या

परभणी ः नांदेड जिल्ह्यातील ऊस उत्पादक शेतकऱ्यांची सोनपेठ (जि. परभणी) तालुक्यातील महाराष्ट्र शेतकरी शुगर्स कारखान्याकडील थकीत देयबाकी तत्काळ देण्यात यावी, या मागणीसाठी स्वाभिमानी शेतकरी संघटनेतर्फे परभणी जिल्हाधिकारी कार्यालयाच्या प्रवेशद्वारावर सोमवारी (ता. १) ठिय्या आंदोलन करण्यात आले. दरम्यान, जिल्हाधिकारी पी. शिवाशंकर यांनी ६ जानेवारी रोजी या कारखान्याच्या लिलावाची कारवाई करून ऊस थकबाकी देण्यात येईल, असे आश्वासन दिल्यानंतर आंदोलन मागे घेण्यात आले. नांदेड जिल्ह्यातील मुदखेड, भोकर, अर्धापूर तालुक्यांतील अनेक गावांतील ऊस उत्पादक शेतकऱ्यांनी २०१५-१६ च्या गळीत हंगामामध्ये सोनपेठ (जि. परभणी) तालुक्यातील महाराष्ट्र शेतकरी शुगर्स साखर कारखान्याकडे घातलेल्या उसाची देयके थकीत आहेत. काही शेतकऱ्यांना प्रतिटन १ हजार ५०० रुपये प्रमाणे देयक अदा करण्यात आले. परंतु अनेक शेतकऱ्यांची देयके थकीत आहेत. शेतकऱ्यांनी तक्रारी केल्यानंतर साखर आयुक्तांनी या कारखान्यावर आरआरसीची कार्यवाही करण्याचे आदेश दिलेले आहेत. मात्र, या प्रकरणी कोणतीही कार्यवाही न करण्यात आल्यामुळे अद्याप नांदेड जिल्ह्यातील शेतकऱ्यांना थकीत ऊस देयक मिळाले नाहीत. त्यामुळे या कारखान्यावर आरआरसीची कार्यवाही करावी. उपलब्ध मालमत्तेचा लिलाव करून ऊस उत्पादकांची थकीत देयबाकी देण्यात यावी, अशी मागणी स्वाभिमानी शेतकरी संघटनने १८ डिसेंबर रोजी जिल्हाधिकारी पी. शिवांशकर यांच्याकडे केली होती. देयक न दिल्यास १ जानेवारी रोजी सामूहिक आत्महत्या करण्याचा इशारा दिला होता. त्या अनुषंगाने सोमवारी (ता. १) सकाळी नांदेड जिल्ह्यातील शेतकऱ्यांनी स्वाभिमानी शेतकरी संघटनेचे जिल्हाध्यक्ष प्रल्हाद इंगोले (नांदेड), भास्कर खटिंग (परभणी), किशोर ढगे, डिगांबर पवार यांच्या नेतृत्वाखाली जिल्हाधिकारी कार्यालयाच्या प्रवेशद्वारावर ठिय्या आंदोलन केले. या वेळी जिल्हाधिकारी पी. शिवशंकर यांनी ६ जानेवारी रोजी पाथरी येथील उपविभागीय कार्यालयामध्ये महाराष्ट्र शेतकरी शुगर्स कारखान्याच्या मालमत्तेचा लिलाव करून ऊस देयके देण्यात येतील, असे आश्वासन दिल्यानंतर सामूहिक आत्महत्या आंदोलन स्थगित करण्यात आल्याचे श्री. इंगोले यांनी सांगितले.