नाशिकला ‘हरित’विरोधात शेतकऱ्यांचा एल्गार

नाशिक : स्मार्ट सिटी अभियानांतर्गत मखमलाबाद व हनुमानवाडी परिसरात हरितक्षेत्राअंतर्गत प्रस्तावित नगरपरियोजना राबविण्याच्या नाशिक म्युनिसिपल स्मार्ट सिटी काॅर्पोरेशन लिमिटेड कंपनीच्या प्रस्तावाविरोधात शेतकऱ्यांनी एल्गार पुकारला आहे. न विचारताच परस्पर जमिनी हडपण्याचा डाव आखताच कशाला, असा सवाल शेतकऱ्यांनी केला अाहे. बळजबरीने भूसंपादन करण्याचा प्रयत्न केल्याचा आरोप करीत आंदोलनाचा इशारा दिला आहे. ‘एक इंचही जमीन देणार नाही’ असे सांगत सर्वोच्च न्यायालयातही दाद मागण्याचा इशारा, महापौर, स्थायी समिती सभापती व जिल्ह्याधिकाऱ्यांना दिलेल्या निवेदनाद्वारे दिला आहे.

स्मार्ट सिटी कंपनीतर्फे हरित क्षेत्र विकास कार्यक्रमाअंतर्गत मखमलाबाद व हनुमानवाडी परिसरात नगरपरियोजना राबवली जाणार आहे. त्यासाठी प्रशासनाकडून महासभेवर प्रस्ताव ठेवण्यात आला आहे. महासभेच्या मंजुरीनंतरच त्याला हिरवा कंदील मिळणार असला तरी, या योजनेला शेतकऱ्यांचा तीव्र विरोध आहे. मखमलाबाद, हनुमानवाडी परिसरातील २९४ बाधितांपैकी २७६ शेतकऱ्यांच्या शिष्टमंडळाने मंगळवारी (ता. ९) कंपनीचे मुख्य कार्यकारी अधिकारी प्रकाश थविल यांच्यासह महापौर रंजना भानसी, स्थायी समिती सभापती हिमगौरी आडके-आहेर, जिल्हाधिकारी बी. राधाकृष्णन यांना निवेदन दिले. हरित क्षेत्र विकासांतर्गत ३१५ एकर क्षेत्रात नगररचना परियोजना राबविण्याच्या निर्णयाबाबत शेतकऱ्यांना कोणतीही माहिती नाही.

ज्या शेतकऱ्यांची जमीन घेतली, त्यापैकी अनेक जण यापूर्वीच्या प्रकल्पांमध्येच बाधित आहेत. त्यामुळे हरित क्षेत्र विकासासाठी ५० टक्के जमीन कोणत्याही परिस्थितीत दिली जाणार नाही, असे शेतकऱ्यांनी ठणकावले आहे. शरद कोशिरे, प्रकाश जगझाप, सुरेश पाटील, डॉ. दिनेश बच्छाव यांच्यासह २७६ शेतकऱ्यांच्या निवेदनावर स्वाक्षऱ्या आहेत. अहमदाबादच्या दौऱ्यासाठी कंपनीतर्फे महापौरांसह शेतकऱ्यांची व नगरसेवकांची मनधरणी सुरू आहे. परंतु जागामालक शेतकऱ्यांनी या दौऱ्याला विरोध दर्शविला आहे.