कर्जमाफीसाठी सव्वादोन लाख शेतकऱ्यांचे अर्ज

सोलापूर  : राज्य सरकारने जाहीर केलेल्या कर्जमाफीच्या लाभासाठी सोलापूर जिल्ह्यातील दोन लाख २० हजार ९९० शेतकरी कुटुंबांनी अर्ज दाखल केले आहेत. आता चावडीवाचनाच्या प्रक्रियेनंतर या योजनेची अंमलबजावणी कशी होणार, याकडे सगळ्यांचे लक्ष लागले आहे.

कर्जमाफीचा लाभ मिळविण्यासाठी जिल्ह्यात पंढरपूर तालुक्‍यातून सर्वाधिक ३२ हजार ६९५ अर्ज दाखल झाले आहेत. माळशिरसमधून ३० हजार २९४, माढ्यातून २५ हजार ८०८, करमाळ्यातून २१ हजार ८५९, बार्शीतून २१ हजार ६०९, मोहोळमधून १८ हजार ७२२, अक्कलकोटमधूून १७ हजार ४९०, सांगोल्यातून १७ हजार ८०, दक्षिण सोलापूर तालुक्‍यातून १३ हजार ६४४, उत्तर सोलापूर तालुक्‍यातून नऊ हजार ३०४ शेतकरी कुटुंबांनी अर्ज दाखल केले आहेत. दाखल झालेल्या अर्जांची पारदर्शकपणे पडताळणी करण्यासाठी चावडीवाचन होणार आहे.

चावडीवाचनाचा अहवाल तहसीलदारांच्या अध्यक्षतेखालील तालुकास्तरीय समितीला देण्यात येणार आहे. बॅंकांकडे असलेली कर्जाची माहिती १ ते ६६ कॉलममध्ये भरण्याचे कामही सध्या युद्धपातळीवर सुरू आहे. या सगळ्या प्रक्रियेनंतर कर्जाचे पैसे शेतकऱ्यांच्या बॅंक खात्यावर वर्ग करण्यात येणार आहेत.