मळेगावात शेतकऱ्यांनी साजरी केली काळी दिवाळी !

नगर ः सरकार शेतकऱ्यांच्या मागण्याकडे गांभीर्याने पाहत नाही. शेती आणि शेतकऱ्यांचे नुकसान होत असताना प्रभावी उपाययोजना केल्या जात नसल्याचा आरोप करत मळेगाव (ता. शेवगाव) येथे शेतकऱ्यांनी दिवाळीच्या दिवशी चटणी-भाकरी खाण्यात आनंद मानून शेतकऱ्यांनी काळी दिवाळी साजरी करत सरकारच्या धोरणाचा निषेध केला.  नगर जिल्हामधील शेतकरी सहा ते सात वर्ष शेतकरी आर्थिक संकटात आहे. विदर्भांतच नाही तर संपूर्ण राज्यात शेतकरी आत्महत्या करत आहेत. शासन त्यावर उपाययोजना करत नाही. शेतकऱ्यांना सरसकट कर्ज माफी देण्याची सर्व स्तरांतून मागणी असताना त्याकडे तर दुर्लक्ष केले जात आहे. उलट जास्तीत जास्त शेतकरी कर्जमाफीपासून वंचित कसे राहतील यासाठी प्रयत्न केले जात आहेत. स्वामिनाथन आयोगाच्या शिफारशी लागू करण्याची अत्यंत गरज असताना त्याबाबत आजीबाबत गांभीर्याने घेतले जात नसल्याचे शेतकरी विकास मंडळाचे म्हणणे आहे. या सर्व मागण्यांसह कापसाला सात हजार रुपये प्रतिक्विंटल दर द्यावा, शेतकऱ्यांच्या मुलांचे सर्व शैक्षणिक शुल्क माफ करण्याबाबत सरकारने सकारात्मक विचार करण्याच्या गरज असताना, सरकार त्याकडे दुर्लक्ष करत असल्याने, मळेगाव (ता. शेवगाव) येथे शेतकरी विकास मंडळाच्या कार्यकर्त्यांनी गावांतील मुख्य चौकात चटणी-भाकरी खाऊन सरकारचा निषेध करत काळी दिवाळी साजरी केली. या वेळी शेतकरी विकास मंडळाचे अध्यक्ष शिवराज कापरे, माजी सरपंच चंद्रकांत निकम, सुभाष दिवटे, श्रीकांत निकम, रावसाहेब देशमुख, नवनाथ आव्हाड, बापूराव राशीनकर, सुभाष शिंदे, सीताराम काकडे, दादासाहेब उगले, यांच्यासह शेतकरी उपस्थित होते.