शेतकरी कंपन्या लातूरमध्ये उभारणार डाळी, सोयाबीन सुविधा केंद्र

लातूर : स्पर्धाक्षम बाजार घटक म्हणून शेतकरी उत्पादक कंपन्यांची स्वतंत्र पणन व्यवस्था उभी करण्यासाठी महाएफपीसी व लातूर जिल्हा शेतकरी उत्पादक कंपनी यांच्या पुढाकारातून लातूर येथे सार्वजनिक खाजगी भागीदारी तत्त्वावर डाळी व सोयाबीन पणन सुविधा केंद्र उभारण्याबाबत कंपन्यांनी शिक्कामोर्तब केले आहे. या बाबतची जिल्ह्यातील ९१ शेतकरी उत्पादक कंपन्यांची खरीप हंगाम २०१९ च्या नियोजनाची महत्त्वपूर्ण बैठक लातूर येथे पार पडली.  लातूर बाजारपेठ डाळींच्या बाबतीत आशिया खंडामधील प्रमुख बाजार आणि सोयाबीन प्रक्रिया उद्योगाचे प्रमुख केंद्र आहे. या बाजार केंद्रांचा थेट शेतकऱ्यांना फायदा मिळवून देण्यासाठी मूल्यवर्धन साखळीत पायाभूत सुविधा महत्त्वाच्या आहेत. यामध्ये प्रामुख्याने अत्याधुनिक साठवणूक व्यवस्था (सायलो), इलेक्ट्रॉनिक मार्केट यांचा समावेश असणार आहे.  सदर प्रकल्पात सहभागी होणाऱ्या शेतकरी कंपन्यांना बाजारपेठ उपलब्ध होण्यास मदत होणार आहे. या सुविधांच्या द्वारे शेतकरी कंपन्या एकत्रितपणे शेतमालाची साठवणूक करून स्थानिक प्रक्रियादार व स्टॅकिस्ट आणि त्याचप्रमाणे परराज्यातील बाजारपेठ यांना त्यांच्या मागणीप्रमाणे पुरवठा करून पर्यायी व्यवस्था उभारून बाजारात संघटितपणे आपला प्रभाव निर्माण करतील. प्रकल्पासाठीचा स्वहिस्सा शेतकरी कंपन्या भागभांडवलामधून उभारणार आहेत. पायाभूत सुविधा उभ्या करण्यासाठी राज्य शासनाची मदत घेतली जाणार आहे. राज्याचा पणन विभाग तसेच जागतिक बँक अर्थसहाय्यित ‘स्मार्ट’ प्रकल्पाच्या माध्यमातून सार्वजनिक गुंतवणूक आणण्यासाठी  प्रयत्न होणार आहेत. उद्योग विभागाने शेतकरी कंपन्यांना एमआयडीसी मध्ये जमिनी उपलब्ध करून देण्याचा निर्णय घेतल्याने सदर प्रकल्पासाठी लातूर एमआयडीसी येथे जागेची चाचपणी देखील सुरू केली आहे. या बैठकीसाठी महाएफपीसीचे अध्यक्ष योगेश थोरात, लातूर जिल्हा शेतकरी उत्पादक कंपनीचे मोहन भिसे, बबन भोसले, लालासाहेब देशमुख, विलास उफाडे व शेतकरी उत्पादक कंपन्यांचे संचालक उपस्थित होते.