साहेब, निकृष्ट बियाण्याने आमचा घात केला बघा !

नेर, जि. यवतमाळ : साहेब, निकृष्ट दर्जाच्या बियाण्याने आमचा घात केला बघा; आम्हाला नुकसानीची भरपाई द्या, नाहीतर शेतकऱ्यांचं जगणं अवघड होईल, असे म्हणत मांगलादेवी (ता. नेर) येथील रामभाऊ दहापुते यांनी आपल्या आसवांना वाट मोकळी करून दिली.   नेर तालुक्‍यातील अनेक गावांमध्ये निकृष्ट दर्जाच्या बी. टी. बियाण्यामुळे बोंडअळीचा प्रादुर्भाव वाढीस लागल्याचा आरोप आहे. रविवारी (ता. २९) महसूल राज्यमंत्री संजय राठोड, अमरावती विभागीय कृषी सहसंचालक सुभाष नागरे, डॉ. पंजाबराव देशमुख कृषी विद्यापीठाचे संशोधन संचालक डॉ. दिलीप मानकर, जिल्हा अधीक्षक कृषी अधिकारी नवनाथ कोळपकर, केव्हीकेचे कार्यक्रम समन्वयक डॉ. सुरेश नेमाडे, प्रमोद यादगीरवार यांनी भेट दिली. यावेळी शेतकऱ्यांनी आपल्या भावना या अधिकाऱ्यांसमोर मांडल्या.  रामभाऊ दहापुते यांच्या संपूर्ण तीन एकरातील कपाशी पिकातील बोंड प्रादुर्भावग्रस्त आहेत. एक क्‍विंटल उत्पादकतेचीही शक्‍यता नाही. त्यामुळे डोक्‍यावरच्या कर्जाची परतफेड, घरखर्च भागविण्यासाठीच्या पैशाची सोय, वैद्यकीय खर्च आणि इतर कामांसाठी लागणारा पैसा कोठून आणावा? या विवंचनेत ते आहेत. तीन एकर क्षेत्रातील कोणतेही बोंड घ्या ते किडरोगग्रस्त नसेल तर एक लाख रुपये देऊ, असे ते खिन्नपणे म्हणाले. शासनाने या भागातील नुकसानीची दखल घेत मदत करावी, अशी मागणी त्यांनी केली. शासन मदत देण्यास असमर्थ असेल तर शेतकऱ्यांनी कस जगावं, असे म्हणत त्यांनी आसवांना वाट मोकळी केली.  नेर तालुक्‍यातील चिखली, कान्होबा, टाकळी सलामी, मांगूळ, लोनाडी, पिंपळगाव या गावात बोंडअळीमुळे उत्पादकतेवर परिणाम झाला आहे. 

एक ट्रॉली खराब बोंड  संगीता श्रीराम ढबाले (शिरजगाव रा. पांढरी) या महिला शेतकरी थेट थैलीत (पिशवीत) बोंड घेऊन पोचल्या. एक ट्रॉलीभर प्रादुर्भावग्रस्त बोंड तोडून शेताबाहेर त्यांनी ढीग लावला आहे. महसूल राज्यमंत्री व कृषी तज्ज्ञांनी आपल्या शेतालादेखील भेट द्यावी याकरीता थेट पिशवीत बोंड भरून त्या मांगलादेवी येथे पोचल्या. त्यांनीदेखील आपली व्यथा यावेळी अधिकाऱ्यांसमोर मांडली. निकृष्ट बी.टी. बियाणे विकणाऱ्या कंपन्यांवर कारवाईची मागणी यावेळी संगीता ढबाले यांनी केली.