शेतकरी कन्या झाली उत्पादन शुल्क निरीक्षक

यवतमाळ : इंजिनिअर होऊन प्रशासकीय सेवेत आपले भविष्य घडविण्याचा प्रयत्न आज अनेक जण करताना दिसतात. दिग्रस तालुक्‍यातील बेलोरा येथील शेतकऱ्याच्या मुलीनेही बी. ई. झाल्यानंतर खासगी कंपन्यांतील नोकरीच्या मागे न लागता महाराष्ट्र लोकसेवा आयोगाची परीक्षा उत्तीर्ण करून अधिकारी होण्याचे स्वप्न साकार केले.

तालुक्‍यातील बेलोरा येथील राजकुमार वानखडे यांची कन्या स्वाती ही महाराष्ट्र लोकसेवा आयोगाची परीक्षा उत्तीर्ण झाली. ती पीएसआय, विक्रीकर इन्स्पेक्‍टर व उत्पादन शुल्क निरीक्षक या तिन्ही विभागांतील अधिकारी पदासाठी पात्र ठरली आहे. तिचे वडील शेतकरी आहेत. आई संध्या वानखडे गृहिणी आहे. त्या दोघांचेही शिक्षण दहावीपर्यंत झाले. त्यांनी मुलांची शिक्षणातील आवड बघून त्यांचे भविष्य सुखमय व्हावे म्हणून पोटाला चिमटा काढून मुलांना शिकविले. वेळप्रसंगी शेतीचा तुकडा विकून मुलांचे शिक्षण पूर्ण केले. मुलांनीही आई-वडिलांच्या विश्‍वासाला तडा जाऊ न देता परिश्रमपूर्वक शिक्षण पूर्ण केले. नोकरीला लागले.

मोठा मुलगा सागर ग्रामसेवक म्हणून दारव्हा पंचायत समितीत कार्यरत आहे. तर लहान मुलगा विशाल एमबीए करून पुण्यातील कंपनीत नोकरीला आहे. मुलगी स्वातीने तर महाराष्ट्र लोकसेवा आयोगाच्या पीएसआय, विक्रीकर इन्स्पेक्‍टर व उत्पादन शुल्क निरीक्षक या तिन्ही परीक्षा उत्तीर्ण करून आई-वडिलांसह भावंडांनाही सुखद धक्काच दिला आहे. विशेष म्हणजे फावल्या वेळात तिने तलाठ्याची परीक्षा उत्तीर्ण करून नोकरी केली.

सोबतच महाराष्ट्र लोकसेवा आयोगाची परीक्षा उत्तीर्ण झाली. तिचे बारावीपर्यंतचे शिक्षण दिग्रस येथेच झाले. इंजिनिअरिंग कॉलेज नांदेड येथून तिने बी.ई.ची पदवी प्राप्त केली. येथील बुटले महाविद्यालयातील वाचनालयात तिने महाराष्ट्र लोकसेवा आयोगाच्या परीक्षेचा अभ्यास केला. शेतकरी आत्महत्याग्रस्त म्हणून ओळख असलेल्या यवतमाळ जिल्ह्यातील एका शेतकऱ्याच्या मुलीने शिक्षणात घवघवीत यश प्राप्त करून इतरांसमोर एक आदर्श निर्माण केला आहे. ती लवकरच उत्पादन शुल्क निरीक्षक म्हणून रुजू होणार आहे. तिचे या यशाबद्दल सर्वत्र कौतुक होत आहे.