वऱ्हाडात उडीद, मुगासाठी खरेदी केंद्रे सुरू करण्याची मागणी

अकोला  ः या भागात सध्या मूग, उडदाचा हंगाम सुरू झाला असून, दुर्दैवाने कुठल्याच बाजारात मूग, उडिदाला हमीभावाइतकाही दर मिळेनासा झाला अाहे. त्यामुळे शासनाने तातडीने हमीभावाने खरेदी सुरू करण्याची मागणी शेतकऱ्यांमधून केली जात अाहे. दुसरीकडे प्रशासकीय स्तरावर याबाबत अद्याप कुठल्याही हालचाली सुरू नसल्याने खरेदी केंद्र सुरू होण्यास अाणखी किती दिवस लागतील याचे स्पष्ट उत्तर अधिकाऱ्यांकडेही नाही.

सध्या बाजारात उडिदाची सरासरी ३८०० व मुगाची खरेदी सरासरी पाच हजार रुपये क्विंटल दराने खरेदी होत अाहे. वास्तविक केंद्र शासनाने मुगाचा हमीभाव ६९७५ तर उडिदाचा ५६०० रुपये क्विंटल असा जाहीर केला अाहे. मात्र या हमीभावाच्या अासपासही सध्या बाजारात दर मिळेनासा झालेला अाहे. हमीभाव व सध्याचे बाजारपेठेतील दर यामध्ये मोठी तफावत तयार झालेली अाहे.

वास्तविक सध्या बाजारात चांगल्या दर्जाचा शेतमाल विक्रीला येत अाहे. मूग, उडिदाची काढणी बऱ्यापैकी झाल्याने बाजारपेठांमधील अावक सातत्याने वाढत अाहे. असे असताना खरेदी केंद्रे मकी या काळात सुरू झालेली नाहीत. शासनाने मागील हंगामापासून शेतमाल खरेदीपूर्वी शेतकऱ्यांकडून अाॅनलाइन पद्धतीने नोंदणी करणे बंधनकारक केलेले अाहे.

शिवाय या वर्षीपासून खरेदी केंद्र उघडण्यासाठी संबंधित मध्यस्थ संस्थेला अनेक बाबींची पूर्तता करणे सक्तीचे करण्यात अाले. जोपर्यंत ही मध्यस्थ संस्था कागदपत्रे, मागील तीन वर्षातील संस्थेचे अाॅडिट, पॅन, बँक खाते व इतर माहितीची पूर्तता करीत नाही तोवर खरेदी केंद्रसुद्धा मिळणार नाही. या नव्या पद्धतीमुळे शासन दरवर्षी होणारी बदनामी टाळण्याचा प्रयत्न करीत असल्याचे बोलले जात अाहे.

वऱ्हाडात या हंगामात मुगाचे लागवड क्षेत्र ६० हजार हेक्टरपेक्षा अधिक तर उडिदाचे ५५ हजार हेक्टर होते. काही भागात मुगाचे एकरी दोन ते साडेतीन क्विंटलपर्यंत उत्पादनही झाले. उडिदाचेही पीक समाधानकारक येत अाहे. हमीभाव खरेदी केंद्र सुरू झाल्यास बाजारपेठांमधील दरसुद्धा वधारतात, असा अनुभव असल्याने शासनाने तातडीने हे खरेदी केंद्र सुरू करण्याची गरज शेतकरी व्यक्त करीत अाहेत.