ऊस जाळण्याची परवानगी द्या : शेतकऱ्यांची मागणी

औरंगाबाद : मिळणाऱ्या दरात ऊसपीक परवडत नसल्याने पीक जाळण्याची परवानगी द्यावी, अशी मागणी माजलगाव तालुक्‍यातील शेतकऱ्यांनी केली. या संदर्भात मंगळवारी (ता.७) प्रादेशिक साखर सहसंचालक कार्यालयासमोर शेतकऱ्यांनी निदर्शने करत निवेदन सादर केले.  माजलगाव तालुक्‍यात उसाला खर्चाला परवडणारे दर देण्यासाठी शेतकऱ्यांचे आंदोलन सुरू आहे. त्याची दखल घ्यावी यासाठी शेतकरी संघर्ष समितीचे गंगाभीषण थावरे यांच्या नेतृत्वात शेतकऱ्यांनी मंगळवारी शेतकऱ्यांनी प्रादेशिक साखर सहसंचालक कार्यालयावर धडक दिली. यंदा मजुरी ३०० रुपयांवर पोचली, खताचे दर २४०० रुपयांवर पोचले, नांगरणीचा दर १५०० रुपये व ढेवळ भुगा करण्याचे दर ७०० रुपये झाले आहेत. ऊस लावणीचा दर ५ हजार रुपये आहे. उसाला गुजरातमध्ये ४७४१ रुपये, पश्चिम महाराष्ट्रात ३००० ते ३४०० मग मराठवाड्यातील ऊस उत्पादक शेतकऱ्यांनाच २००० रुपयांचा दर का, असा सवाल आंदोलक शेतकऱ्यांनी उपस्थित केला आहे. उसाला मिळणारे आजचे दर परवडत नाहीत. त्यामुळे आम्हाला ऊस जाळण्याची परवानगी देण्याची मागणी शेतकऱ्यांनी केली आहे. तसेच माजलगाव परिसरातील तीन कारखान्यांकडून २६५ या ऊस वाणाची नोंद घेणार नसल्याचे म्हटले आहे. कारखान्यांनीच उसाचे बेणे २००० ते २५०० रुपये दराने दिले असताना त्याची नोंद न घेण्यामागे शेतकरी म्हणून आमची काय चूक, असा सवाल शेतकऱ्यांनी उपस्थित केला. याप्रकरणी दरासंबंधी वरिष्ठांकडे शेतकरी मागणीची माहिती पाठविली जाईल व रिकव्हरी; तसेच काटामारीविषयी चौकशी करण्याचे आश्वासन अधिकाऱ्यांनी दिल्याचे गंगाभीषण थावरे यांनी सांगितले.