जळगाव : परदेशातील शेतीचे तंत्रज्ञान, शेती, प्रकल्प आदींची माहिती घेण्यासह शेतीबाबत जागरूकता आणण्यासाठी उपयुक्त ठरणारा परदेश अभ्यास दौऱ्याचा मुहूर्त अजूनही ठरलेला नाही. या दौऱ्यासंबंधीचे अर्ज कृषी आयुक्तालयात नोव्हेंबर २०१७ मध्ये पाठविले होते, परंतु कुणाची निवड झाली व दौरा केव्हा निघेल, हे स्पष्ट झालेले नाही.
जिल्ह्यातील ९९ शेतकऱ्यांनी परदेश अभ्यास दौऱ्यासाठी अर्ज केले होते. हे अर्ज जून महिन्यापासून यायला सुरवात झाली होती. नोव्हेंबरअखेर त्यांची पडताळणी, तपासणी करून निकषानुसार ते कृषी आयुक्तालयात पाठविले. नंतर पुढे या अर्जांचे काय झाले, काय सूचना आल्या हे शासनाच्या कृषी विभागातील कर्मचारी सांगायला तयार नाहीत.
इस्राईल, ऑस्ट्रेलिया व नेदरलॅण्ड येथे दौरा आयोजित करण्याचे नियोजन कृषी विभागाने केले होते. यासाठी निम्मा खर्च शेतकऱ्यांना करायचा आहे. निम्मा खर्च शासन करील, असे शेतकऱ्यांना सांगण्यात आले होते. नंतर जे अर्ज आले, त्यासंबंधीची सोडतही २२ ऑक्‍टोबर २०१७ रोजी काढण्यात आली.
या सोडतीत, ज्यांची नावे आली, त्यांना प्रथम संधी मिळेल. दौरा मागील वर्षीच पार पडेल, असे अपेक्षित होते, परंतु नवीन वर्ष सुरू होऊन अडीच महिने झाले, तरीही परदेश शेतकरी अभ्यास दौऱ्याबाबत निर्णय का होत नाही, असा प्रश्‍न शेतकऱ्यांनी उपस्थित केला आहे. दौरा का पार पडत नाही यासंदर्भात काही शेतकऱ्यांनी थेट कृषी आयुक्तालयाशी संपर्क साधला. परंतु तेथे या दौऱ्याचे अर्ज प्रलंबित असल्याची माहिती त्यांना मिळाली आहे.
