चारशे किलो टोमॅटोची पट्टी रुपया ! (व्हिडिओसह)

सासवड, जि. पुणे : येथील संतोष जगताप या शेतकऱ्याने ४०० किलो टोमॅटो विक्रीसाठी मुंबईला पाठविला होता. सर्व खर्च वजा जाता त्यांच्या हातात एक रुपया पडला आहे. आता मजुरी कशी द्यायची, असा प्रश्‍न जगताप यांना पडला आहे.  आम्ही १७ क्रेट म्हणजेच ४०० किलो टोमॅटो तोडून ३० ऑगस्ट रोजी मुंबईला अडतदाराकडे पाठविले होते. टोमॅटोची एकूण पट्टी १,३३२ रुपये झाली. मुंबईपर्यंत वाहतूक, हमाली, तोलाई, बारदाना, टपाल हा सारा खर्च १,३३१ रुपये आला. हाती केवळ एक रुपया आला. तोडणीला २ महिला व एक पुरुष मजूर होते, त्यांची मजुरी ७५० रुपये आता कोठून द्यायची, असा आमच्यापुढे प्रश्‍न आहे, जगताप यांनी सांगितले.  पहा प्रत्यक्ष व्हीडिअो...

टोमॅटोच्या पडलेल्या बाजारभावाने उत्पादक शेतकरी निराश आहेत. बावीस ते चोवीस किलोच्या क्रेटला ६० ते ७० रुपये भाव मिळत आहे. म्हणजे किलोमागे अडीच ते तीन रुपये भाव मिळत असून, यात उत्पादनखर्च व तोडणी मजुरीही निघत नसल्याचे शेतकऱ्यांनी सांगितले. टोमॅटो निर्यातीअभावी देशाबाहेर जात नाही.

काही ठराविक शहरे व स्थानिक मार्केटमध्ये त्याची आवक वाढल्याने टोमॅटोचे भाव कोसळले आहेत. चांगल्या मालाची ही तऱ्हा तर लहान माल, थोडी कमी प्रतवारी असलेला टोमॅटो तर बांधावरच फेकून देण्याची वेळ शेतकऱ्यांवर आली आहे, असे पुरंदरमधील अनेक शेतकऱ्यांनी सांगितले. डाळिंबालाही बाजारभाव नसल्याने शेतकऱ्याला २५ ते ३५ रुपये किलोचा भाव मिळत आहे; पण शहरी ग्राहकांना तोच डाळिंब ८० ते ९० रुपये किलोने घ्यावा लागतो, असे एक शेतकऱ्याने सांगितले.