बँकेच्या चुकीमुळे रखडलेला पीकविमा ४ वर्षांनंतर मिळणार

वाशीम : शेतकऱ्यांनी भरलेला पीकविमा बँकेने विमा कंपनीकडे न पाठवल्याने सन २०१४ च्या हंगामापासून शेतकरी पाठपुरावा करीत होते. विष्णुपंत भुतेकर यांच्या नेतृत्वात शेतकऱ्यांनी २०१५ मध्ये तहसीलसमोर अांदोलन केले. तेव्हापासून पाठपुरावा सातत्याने सुरू होता. या लढ्याला अाता यश अाले असून, शेतकऱ्यांना तो पीकविमा मिळणार अाहे.  सन २०१४ च्या खरीप हंगामात रिसोड तालुक्यातील सुमारे पाचशेपेक्षा अधिक शेतकऱ्यांनी अलाहाबाद बँकेच्या रिसोड शाखेत पिकविमा भरला होता. परंतु सदर विम्याची रक्कम या शाखेने विमा कंपनीकडे पाठवलीच नव्हती. परिणामी शेतकऱ्यांना विम्याचा मोबदला तेव्हापासून मिळाला नव्हता. या पाचशे शेतकऱ्यांच्या हक्काचा विमा मिळण्यासाठी श्री. भुतेकर यांनी पाठपुरावा केला. तत्कालीन तहसीलदार अमोल कुंभार यांनी बँकेची चूक असल्याचा स्पष्ट अहवाल दिला होता. याअाधारे सातत्याने शासन, प्रशासन आणि बँकेकडे पत्र व्यवहार करण्यात अाला. अखेर बँकेने चूक मान्य करून शेतकऱ्यांना  स्वतःच्या फडांतून पैसे देण्याचे मान्य केले.  या अनुषंगाने रिसोडचे तहसीलदार सुरडकर साहेब, विष्णुपंत भुतेकर आणि बँक शाखाधिकारी कुलकर्णी यांच्या उपस्थितीत एका छोटेखानी कार्यक्रमाचे आयोजन करण्यात आले होते. या कार्यक्रमाला शेतकरी मोठ्या संख्येने उपस्थित होते. या वेळी श्री. कुलकर्णी यांनी शेतकऱ्यांच्या खात्यात २०१४ चे पीकविम्याचे पैसे बँकेमार्फत जमा केले जाणार असल्याचे सांगितले, तर भुतेकर यांनी हा लढा यशस्वी होण्यासाठी निवासी उपजिल्हाधिकारी शैलेश हिंगे, तहसीलदार अमोल कुंभार, बँकेचे तत्कालीन शाखाधिकारी प्रदीप मिश्रा, विद्यमान शाखाधिकारी कुळकर्णी यांचे सहकार्य असल्याचे सांगितले. कार्यक्रमासाठी संजय सदार, पुरुषोत्तम रंजवे, श्रीराम नागरे, डाॅ. अमर दहीहांडे, अविनाश कायंदे, ओमकार जाधव, आत्माराम गोरे, विलास जाधव यांच्यासह मोठ्या प्रमाणावर शेतकरी व कार्यकर्ते उपस्थित होते. कार्यक्रमाचे सूत्रसंचालन महावीर ठाकूर यांनी केले.