वाशीम बाजार समितीतच मिळणार शेतकऱ्यांना कागदपत्रे

वाशीम : शेतीसाठी लागणारा सातबारा उतारा, फेरफार, कोटवार बुकाची नक्कल व इतर बाबींसाठी शेतकऱ्यांना कायम पायपीट करावी लागते; मात्र आता वाशीम कृषी उत्पन्न बाजार समितीच्या आवारात कागदपत्रे उपलब्ध असणारी ‘एटीडीएम’ मशिन बसविण्याचा निर्णय बाजार समितीने घेतला आहे. या संदर्भात जिल्हाधिकारी कार्यालयाकडे अडीच लाखांचा धनादेशही जमा करण्यात आला आहे.  शेतकऱ्यांना पीककर्ज व इतर बाबींसाठी सातबाराचा उतारा, फेरफारची गरज पडते. आता ‘ऑनलाइन’ कागदपत्रे मिळत असल्याने शेतकऱ्यांना सेतू केंद्रासमोर तासनतास उभे राहावे लागते. ही बाब लक्षात घेऊन वाशीम कृषी उत्पन्न बाजार समिती प्रशासनाने जिल्हाधिकाऱ्यांकडे बाजार समितीच्या आवारात सर्व कागदपत्रे अवघ्या ३० रुपयांत मिळणारी मशिन (एटीडीएम) बसविण्याची मागणी केली होती. यावर जिल्हाधिकारी कार्यालयाने बाजार समितीला मशिनचे दोन लाख २० हजार रुपये व डेटा सेंटरसाठी ३० हजार रुपये, असा दोन लाख ५० हजार रुपयांचा भरणा करण्यास सांगितले होते. त्यानुसार कृषी उत्पन्न बाजार बाजार समितीचे सभापती नारायणराव गोटे, उपसभापती सुरेश मापारी, संचालक राजू चौधरी, दामुअण्णा गोटे, रामेश्‍वर काटेकर, बाबूराव उगले, विनोद पट्टेबहादूर, हिराभाई जानीवाले, सचिव बबनराव इंगळे यांच्या उपस्थितीत जिल्हाधिकाऱ्यांमार्फत अडीच लाखांचा धनादेश संबंधित कंपनीकडे सोपविण्यात आला आहे.  बाजार समितीच्या आवारातच कागदपत्रांची सुविधा करून देणारी राज्यातील ही पहिली बाजार समिती ठरणार आहे. येत्या आठ दिवसांत ‘एटीडिएम’ मशिन बसविण्यात येणार असल्याची माहिती बाजार समितीचे सचिव बबनराव इंगळे यांनी दिली.