शेतकऱ्यांना समान पीकविमा परतावा मिळावा ः चव्हाण

नांदेड ः गतवर्षीच्या खरिपातील पिकांच्या नुकसानी बद्दल जिल्ह्यातील शेतकऱ्यांना समान विमा परतावा मिळण्यासाठी तसेच राष्ट्रीय महामार्गासाठी संपादित करण्यात येणाऱ्या जमिनीच्या मोबदल्याबाबत योग्य कार्यवाही करावी, असे निर्देश खासदार अशोक चव्हाण यांनी दिले.

जिल्हाधिकारी कार्यालयामध्ये डॉ. शंकरराव चव्हाण जिल्हा नियोजन भवन येथे शुक्रवारी (ता. २२) दुपारी विविध विषयांच्या आढावा बैठकीमध्ये खासदार अशोक चव्हाण बोलत होते.  या वेळी आमदार अमिताताई चव्हाण, आमदार डी. पी. सावंत, आमदार वसंतराव चव्हाण, आमदार अमर राजूरकर, जिल्हाधिकारी अरुण डोंगरे, अतिरिक्त मुख्य कार्यकारी अधिकारी शरद कुलकर्णी, निवासी उपजिल्हाधिकारी जयराज कारभारी, जिल्हा अधीक्षक कृषी अधिकारी आर. बी. चलवदे आदी उपस्थित होते. या वेळी खासदार चव्हाण म्हणाले, की भोकर आणि देगलूर तालुक्यांतील शेतकऱ्यांना समान पीकविमा मिळण्यासाठी योग्य ती कार्यवाही करावी. राष्ट्रीय पेयजल योजनांची प्रलंबित कामे तातडीने पूर्ण करावीत. पीककर्ज वाटप, सांसद आदर्शग्राम रोहिपिंपळगाव (ता. मुदखेड) आणि चांडोळा (ता. मुखेड) येथील कामांच्या प्रगतीचा आढावा घेण्यात आला.

आमदार आदर्श ग्राम जांभळी (ता. भोकर) येथील विकास कामांना गती देण्यात यावी. राष्ट्रीय महामार्ग क्रमांक ३६१ मध्ये मिळणाऱ्या निधीबाबत नागरिकांच्या तक्रारीवर योग्य ती कार्यवाही करावी. धनेगाव (ता. नांदेड) येथील व मुजामपेठ (ता. नांदेड) येथील मावेजाबाबत योग्य कार्यवाही करण्यात यावी, असे निर्देश खासदार चव्हाण यांनी दिले.

गतवर्षीच्या खरीप हंगामातील विमा नुकसान भरपाईपासून अनेक तालुक्यांतील शेतकरी वंचित राहिले आहेत. धर्माबाद तालुक्यास पीकविमा परतावा नामंजूर करण्यात आला आहे. वंचित शेतकऱ्यांना विमा नुकसान भरपाई मिळण्याच्या दृष्टीने आवश्यक त्या बाबींचे पुनरवलोकन करण्यासाठी महसूल, कृषी, बॅंक अधिकाऱ्यांची समिती स्थापन करण्यात येणार असल्याचे सूत्रांनी सांगितले.