आरफळ योजनेचे पाणी आल्याने शेतकरी आनंदी

आळसंद, जि. सांगली  ः खानापूर-तासगाव तालुक्‍यांसाठी महत्त्वाची असणारी आरफळ उपसा सिंचन योजना सुरू होऊन आठ ते दहा दिवस झाले आहे. या दोन्ही तालुक्‍यांतील सुमारे दोन हजार एकराला या योजनचे पाणी मिळते. खानापूर तालुक्‍यातील बलवडी (भा) येथील येरळा नदीत पाणी आल्याने शेतकऱ्यांमध्ये आनंदाचे वातावरण निर्माण झाले आहे.

आरफळ योजना खानापूर आणि तासगाव तालुक्‍यांतील काही भागांत पोचली आहे. ताकारी, टेंभू योजना सुरू झाली; पण ही योजना लवकर सुरू केली नाही. त्यामुळे याभागात पाणीटंचाई निर्माण झाली होती. शेतकऱ्यांनी आरफळ योजना सुरू करण्याची मागणी सातत्याने केली होती. परंतु ही योजना लहान असल्याने याकडे कोणीच लक्ष दिले नाही. या योजनेचे लाभ क्षेत्र सुमारे दोन हजार एकराहून अधिक आहे.

आरफळ योजनेच्या पाण्याने बलवडी भा. येथील येरळा नदीतून पाणी वाहू लागले आहे. त्यामुळे येरळाकाठावरील सुमारे पाचशे एकर क्षेत्राला या पाण्याचा फायदा होणार आहे. चार-पाच महिन्यांपासून कोरडी पडलेली नदी पाण्याने तुडुंब भरल्याने शेतकऱ्यांमधून समाधान व्यक्त होत आहे.

येरळाकाठावर मोठ्या प्रमाणात बागायत क्षेत्र आहे. विहिरी, कूपनलिकांची पाणीपातळी खालावली होती. परिणामी बागायत क्षेत्र पाण्याअभावी वाळू लागले होते. बलवडीसह, तांदळगाव, कमळापूर, भाळवणी, वाझर येथून वाहणाऱ्या नदीतून हे पाणी पुढील गावांना मिळणार आहे. या गावातील शेतीलाही या पाण्याचा फायदा होणार आहे. नुकतीच नदीपात्रातील झाडेझुडपे, पानगवत काढून शासनाच्या जलसंपदा विभागाने नदी स्वच्छ केली होती. त्यामुळे नदीत पाण्याचा साठा होण्यास मदत झाली आहे.

शेतकऱ्यांकडून बऱ्याच दिवसांपासून नदीत ताकारीचे पाणी सोडावे, अशी मागणी होत होती. आता पाणी आल्याने शेतीसह नदीकाठच्या विहिरी व कूपनलिकांमधील पाणीसाठ्यात वाढ होणार असल्याचे शेतकरी सांगत आहेत.