जळगाव येथे तुरीला मिळतोय हमीभावापेक्षा कमी दर

जळगाव ः तुरीचे उत्पादन यायला सुरवात झाली, तरीही शासनाचे खरेदी केंद्र सुरू झालेले नाही. अशातच बाजार समित्यांमध्ये तुरीला फक्त ३८०० रुपये क्विंटलपर्यंत दर आहेत. तुरीला हमीभाव मिळत नसल्याचे चित्र असून, शेतकऱ्यांमध्ये असंतोष वाढला आहे. सरकारच्या आडमुठेपणामुळेच धान्य उत्पादकांची लुबाडणूक सुरू असल्याने शेतकऱ्यांनी संताप व्यक्त केला आहे.

जिल्ह्यात मागील हंगामाच्या तुलनेत यंदा तुरीची लागवड निम्मी घटली. कारण मागील हंगामातही तुरीला हवे तसे दर नव्हते. यंदाही मागील हंगामासारखीच स्थिती आहे. खरिपात फक्त तुरीचेच पीक बरे आले आहे. मुक्ताईनगर, रावेर, चोपडा, पारोळा, जळगाव भागात लागवड बरी होती. सुमारे चार हजार हेक्‍टरवर तुरीची लागवड झाली. उत्पादन हेक्‍टरी पाच क्विंटलपर्यंत आहे.

मागील आठवड्यातच तुरीची मळणी सुरू झाली. बागायती तुरीची कापणी व मळणीचे काम सुरू आहे. कमाल शेतकऱ्यांच्या हाती तुरीचे पीक आले आहे. शेतीमाल त्यांच्या घरात आला तरी अजून शासकीय तूर खरेदी केंद्र सुरू झालेले नाही. १५ जानेवारीला तूर खरेदी केंद्र सुरू करण्याचे मध्यंतरी जिल्हा प्रशासनाने म्हटले होते; परंतु केंद्र सुरू झाले नाही. फक्त नोंदणी सुरू आहे. त्यातही तांत्रिक अडचणी येत असून, सर्व्हर डाउन यासंबंधीचे प्रश्‍न आहेत.

तुरीला ५४५० रुपये क्विंटलचा असा बोनससहित हमीभाव शासनाने जाहीर केला आहे; परंतु जळगावसह अमळनेर, चोपडा येथील बाजार समितीत हमीभावापेक्षा कमीच दर तूर उत्पादकांना दिला जात आहे. आवक हळूहळू वाढत आहे. सध्या तुरीला कमाल ३८०० ते ४००० रुपये प्रतिक्विंटलचा दर आहे. हमीभाव मिळत नसल्याने शासनाने तातडीने हस्तक्षेप करावा, अशी मागणी शेतकऱ्यांनी केली आहे.