पुणे : संकटांपुढे हार न मानता प्रतिकूल परिस्थितीशी झुंज देत यश मिळवणाऱ्या कर्तृत्ववान शेतकऱ्यांना यंदाही ॲग्रोवन स्मार्ट ॲवॉर्ड देऊन गौरविण्यात येणार आहे. या उपक्रमास राज्यभरातील शेतकऱ्यांकडून भरघोस प्रतिसाद मिळत असून, प्रस्ताव दाखल होण्यास प्रारंभ झाला आहे.
राज्यस्तरीय आठ व विभागीय पाच गटांमध्ये हे पुरस्कार दिले जाणार आहेत. पुरस्कारांसाठी प्रस्ताव पाठविण्याची अंतिम तारीख २८ जानेवारी २०१९ आहे. शेती क्षेत्र आस्मानी आणि सुलतानी संकटांच्या वावटळीत सापडलेले असताना अनेक शेतकरी पाय रोवून उभे आहेत. ते जिद्द, कल्पकता, प्रयोगशीलतेच्या बळावर आव्हानांवर मात करण्यासाठी धडपडत आहेत. या बहाद्दर शेतकऱ्यांच्या कर्तृत्वाची दखल घेतली जावी आणि इतर शेतकऱ्यांना त्यांच्यापासून प्रेरणा मिळावी, या हेतूने हे पुरस्कार दिले जातात. पुरस्कारांचे यंदाचे हे तिसरे वर्ष आहे.
राज्य पातळीवरील महाराष्ट्राचा स्मार्ट शेतकरी या पुरस्काराचे स्वरूप एक लाख रुपये, स्मृतिचिन्ह आणि सन्मानपत्र असे आहे. तसेच ॲग्रोवन प्रेरणा पुरस्कार आणि ॲग्रोवन स्मार्ट महिला शेतकरी या पुरस्कार विजेत्यांना प्रत्येकी २५ हजार रुपये स्मृतिचिन्ह आणि सन्मानपत्र देण्यात येणार आहे. ॲग्रोवन प्रेरणा पुरस्कार हा आत्महत्याग्रस्त शेतकरी कुटुंबाला आपल्या धडपडीतून पुन्हा उभं करणाऱ्या कर्तृत्ववान महिला शेतकऱ्यांसाठी आहे. तसेच ॲग्रोवन स्मार्ट सेंद्रिय शेती पुरस्कार, ॲग्रोवन स्मार्ट कृषिपूरक व्यवसाय, ॲग्रोवन स्मार्ट कृषी उद्योजक आणि विभागीय पातळीवरील स्मार्ट शेतकरी पुरस्कार (मराठवाडा, विदर्भ, पश्चिम महाराष्ट्र, उत्तर महाराष्ट्र व कोकण) विजेत्यांना प्रत्येकी १० हजार रुपये, स्मृतिचिन्ह आणि सन्मानपत्र दिले जाणार आहे.
यंदापासून दोन नवे पुरस्कार देण्यात येणार आहेत. ॲग्रोवनने २०१९ हे जल व्यवस्थापन वर्ष म्हणून घोषित केले आहे. त्या पार्श्वभूमीवर स्मार्ट जलव्यवस्थापक शेतकरी हा पुरस्कार दिला जाईल. कमी पाण्यात उत्तम शेतीचे प्रयोग करणाऱ्या शेतकऱ्यांसाठी हा पुरस्कार असेल. ॲग्रोवन स्मार्ट संशोधक शेतकरी हा पुरस्कारही देण्यात येणार आहे. आपल्या शेतीमध्ये शास्त्रीय प्रयोग व संशोधन करणाऱ्या शेतकऱ्यांसाठी हा पुरस्कार आहे. विजेत्यांना प्रत्येकी १० हजार रुपये, स्मृतिचिन्ह आणि सन्मानपत्र दिले जाणार आहे.
या पुरस्कारांसाठी तज्ज्ञ व्यक्तींचा समावेश असलेली त्रयस्थ निवड समिती प्राप्त प्रस्तावांची छाननी करून अंतिम विजेत्यांची निवड करणार आहे. हा निर्णय अंतिम आणि सर्वांसाठी बंधनकारक असेल. पुणे येथे शानदार समारंभात मान्यवरांच्या हस्ते पुरस्कारांचे वितरण केले जाईल.
असा पाठवा प्रस्ताव
प्रस्ताव पाठविण्याचा पत्ता : ॲग्रोवन स्मार्ट ॲवाॅर्डस, ॲग्रोवन, द्वारा सकाळ पेपर्स प्रा. लि., ५९५, बुधवार पेठ, पुणे - ४११००२ ई- मेल : agrowonawards@esakal.com
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.