बॅंक कार्यालयासमोर शेतकऱ्यांचे उपोषण

औरंगाबाद : बीड जिल्ह्यातील माजलगाव तालुक्‍यातील काळेगावथडी येथील शेतकऱ्यांनी महाराष्ट्र ग्रामीण बॅंकेच्या विभागीय कार्यालयासमोर सोमवारपासून (ता. ८) आमरण उपोषण सुरू केले आहे. पीककर्ज, मुद्रा कर्जवाटप, बोजा यासह इतर बॅंकेशी संबंधित मागण्यांबाबत दिलेल्या निवेदनाची दखल घेतली नसल्याचा आरोप या शेतकऱ्यांनी केला आहे.  पीककर्ज व मुद्रांक कर्ज वाटपाची उच्चस्तरीय बॅंकिंग अधिकाऱ्यांची नेमणूक करून फील्डवर जावून तपासणी करावी, शाखा संगणकीकृत करण्यात याव्या, ग्राहकाला आवश्‍यक असलेल्या सोयीसुविधा उपलब्ध करून देण्यात याव्या, खरीप २०१८ पीककर्ज ज्या पिकावर वितरित करण्यात आले त्या घटनास्थळाची पाहणी करण्यात यावी, ३१ जुलै २०१७ रोजी माफीस पात्र शेतकऱ्यांकडून जे व्याज वसूल करण्यात आले ते व्याज शेतकऱ्यांच्या बचत खात्यात जमा करण्यात यावे, भारतीय रिझर्व्ह बॅंकेच्या नियमानुसार व चौकटीत राहून बॅंकेचे काम करावे, मुद्रा लोणचा बोजा ज्या खातेदाराच्या सातबारावर टाकण्यात आला आहे तो कमी करण्यात यावा आदी मागण्या उपोषणकर्त्या शेतकऱ्यांनी केल्या आहेत.  उपोषणकर्त्या शेतकऱ्यांमध्ये मोहन तौर, गोविंद तौर, संतोष तौर, गजानन तौर, संतोष तौर, नानाजी तौर यांच्यासह इतर शेतकऱ्यांचा समावेश होता. उपोषणकर्त्या शेतकऱ्यांशी बॅंकेच्या प्रतिनिधींनी संवाद साधला. परंतु सायंकाळी ५.३० पर्यंत उपोषणकर्त्यांच्या मागण्यांवर तोडगा निघाला नव्हता.