जमीन अधिग्रहणाला शेतकऱ्यांचा विरोध

नाशिक : नाशिक-पुणे रेल्वे लाईनच्या महाराष्ट्र रेल इन्फ्रास्ट्रक्चर डेव्हलपमेंट कॉर्पोरेशन लिमिटेड यांच्या वतीने रेल्वे सर्वेक्षण काम नाशिक जिल्ह्यातील नानेगाव येथे सुरू आहे. यास विरोध दर्शविण्यासाठी नानेगाव ग्रामस्थांच्या शिष्टमंडळाने जिल्हाधिकारी राधाकृष्णन.बी यांना लेखी निवेदन दिले.

नानेगाव शिवरातून ही मोजणी होत असताना ग्रामस्थांनी या मोजणीच्या कामात हस्तक्षेप केला होता. या प्रकल्पामुळे गावातील एकूण क्षेत्रापैकी ३० टक्के क्षेत्र हे रेल्वे मार्गात जाण्याची भीती ग्रामस्थांना आहे. यामुळे गाव दोन ठिकाणी विभागेल व संपूर्ण बागायती क्षेत्र जाण्याची शक्यता आहे. गावची लोकसंख्या ४५०० च्या जवळपास आहे. त्यात रोजगाराचे साधन शेती असल्यामुळे भूमिहीन व बेरोजगार होण्याच्या भीतीने सर्व चिंतेत आहेत. त्यामुळे ग्रामस्थांनी खा.हेमंत गोडसे यांच्यासह राधाकृष्णन. बी यांच्यासममोर मार्गाला विरोध केला.

द्राक्ष व इतर फळबागा असलेले हे क्षेत्र आहे. संपूर्ण गाव शेतीवर अवलंबून आहे. त्यामुळे अन्याय करू नका, अशी भूमिका ग्रामस्थांनी मांडली.

नाशिक रोड, शिंदे, मोहदरी, सिन्नर, पुणे असे सर्वेक्षण झाले. दुसऱ्या मार्गाचे सर्वेक्षण नाशिक रोड, एकलहरे, जाखोरी, सिन्नर यामागे झाले असल्याचे निवेदनाद्वारे निदर्शनास आणून दिले.

नाशिक रोड ते इंडिया बुल्स (सिन्नर) चे पर्यायी रेल्वे मार्गाचे काम अंतिम टप्प्यात आहे. या मार्गाऐवजी उपलब्ध रेल्वे मार्गाबाबत विचार करावा. नवीन नाशिकरोड, बेलतगव्हान, संसरी, शेवगे दारणा, नानेगाव, वडगाव, सिन्नर या रेल्वे मार्गाचे सर्वेक्षण बंद करावे, अशी मागणीही करण्यात आली.