पुणे जिल्ह्यात शेतकऱ्यांनी केले जेल भरो आंदोलन

पुणे : कर्जमुक्ती, दुधासंदर्भात शासन निर्णयाची अंमलबजावणी करणे, वीजबिलमुक्ती आणि शेतीमालाला उत्पादन खर्च व पन्नास टक्के नफा यांचे सरकारने दिलेले आश्वासन पाळणे नाही, म्हणून शेतकरी संघटनांची सुकाणू समितीच्या वतीने सोमवारी (ता. १४) जिल्ह्यातील इंदापूर, दौंड, शिरूर, खेड आणि जुन्नर या ठिकाणी जेल भरो आंदोलन केले आहे.  इंदापूरमध्ये शेतकरी संघटनेचे पुणे जिल्हा अध्यक्ष पांडुरंग रायते, हरिदास पवार, सचिन देशमाने, मंगेश घाडगे, दौडमध्ये क्रांतिसिंह नाना पाटील ब्रिगेडचे अध्यक्ष शिवाजी नांदखिले, शिरूर बाळासाहेब घाडगे, खेड शेतकरी संघटनेचे उपाध्यक्ष वस्ताद दौंडकर, जुन्नर लक्ष्मणराव शिंदे, संजय भुजबळ यांच्या उपस्थितीत विविध ठिकाणच्या पोलिस स्टेशनच्या आवारात जेल भरो आंदोलन करण्यात आले.   शेतकरी संघटनेचे पुणे जिल्हा अध्यक्ष पांडुरंग रायते म्हणाले, ``गेल्या वर्षी एक जून रोजी झालेल्या शेतकरी संपाच्या अनुषंघाने राज्य सरकारच्या वतीने राज्याचे मुख्यमंत्री देवेंद्र फडणवीस यांच्या माध्यमातून शेतकऱ्यांना दहा कर्जमाफी, वीजबिलमाफी आणि शेतीमालाला उत्पादन खर्च अधिक पन्नास टक्के नफा असे आश्वासन दिले होते. त्याचबरोबर गाईच्या दुधाला २४ रुपयांएेवजी २७ रुपये दर देण्यात येईल याबाबतचा शासन निर्णय १९ जून २०१७ काढण्यात आला होता. या आदेशाची अंमलबजावणी दहा जुलै २०१५ च्या शासन निर्णयाप्रमाणे घेण्यात येईल. यामध्ये शासन निर्णय न पाळणाऱ्या दूध संस्थावर महाराष्ट्र सहकारी संस्था अधिनियम १९६० चे कलम ७९ अ प्रमाणे कारवाई होणे अभिप्रेत होते. झालेला निर्णय एक वर्ष उलटूनदेखील सत्ताधारी व विरोधक मूग गिळून गप्प आहे.’’