कुपोषण मुक्तीसाठी शेतकऱ्याने शेवगा बियाणे दिले भेट

नाशिक  : कुपोषण निर्मूलनाच्या कार्यास आपलाही हातभार लागावा या सामाजिक भावनेतून नगर जिल्ह्यातील शेवगाव येथील ७५ वर्षाच्या एका शेतकऱ्याने सोमवारी (ता. १८) जिल्हा परिषदेत स्वखर्चाने ४० किलो शेवग्याच्या बिया अतिरिक्त मुख्य कार्यकारी अधिकारी अनिल लांडगे यांचेकडे सुपूर्द केल्या. जिल्हा परिषदेचे मुख्य कार्यकारी अधिकारी डॉ. नरेश गिते यांनी जिल्ह्यात सुरू केलेल्या कुपोषण निर्मूलन मोहिमेस समाजातील सर्वस्तरातून पाठिंबा मिळत असून, कुपोषण निर्मूलनासाठी जिल्ह्यात लोकचळवळ निर्माण झाल्याचे अनिल लांडगे यांनी या वेळी सांगितले.

जिल्हा परिषदेचे मुख्य कार्यकारी अधिकारी डॉ. नरेश गिते यांनी जिल्हा परिषदेचे सूत्रे घेतल्यापासून कुपोषण या विषयाला सर्वाधिक महत्त्व दिले आहे. यासाठी जिल्ह्यात नव्याने सर्वेक्षण करून माहिती घेण्यात आली आहे. जिल्हाभरात तीव्र कुपोषित व मध्यम कुपोषित बालकांसाठी ग्रामस्तरावर बाल ग्राम विकास केंद्रांची स्थापना करण्यात आलेली आहे.

कुपोषण निर्मूलनासाठी आहार तसेच औषध याबरोबरच गरोदर माता, स्तनदा माता, कुपोषित बालक यांचेसाठी शेवगा किती महत्त्वपूर्ण आहे, याबाबत डॉ. गिते यांनी माहिती देत जिल्हा शेवगामय करण्याचा निर्धार केला आहे. अंगणवाडी परिसर, जिल्हा परिषद शाळा, प्राथमिक आरोग्य केंद्र आदी ठिकाणी शेवगा लागवड करण्यात येत आहे. यासाठी शेतकरी मोफत बियाणे उपलब्ध करून देत आहेत. नाशिक जिल्ह्यात सुरू असलेल्या या उपक्रमाची माहिती मिळताच नगर जिल्ह्यातील शेवगाव येथील शेतकरी श्रीराम धूत यांनी आपल्याकडील ४० किलो शेवगा बियाणे जिल्हा परिषदेला मोफत उपलब्ध करून दिले आहे.

जिल्हा परिषदेच्या रावसाहेब थोरात सभागृहात अनिल लांडगे, ग्रामपंचायत विभागाचे उप मुख्य कार्यकारी अधिकारी राजेंद्र पाटील, कार्यकारी अभियंता प्रकाश नंदनवरे आदींच्या उपस्थितीत श्रीराम धूम यांनी शेवगा बियाणे सुपूर्द केले.