शेतकऱ्यांनी पाडली तूर खरेदी बंद

शेतकऱ्यांनी पाडली तूर खरेदी बंद
शेतकऱ्यांनी पाडली तूर खरेदी बंद

यवतमाळ : हमीभावापेक्षा ९०० ते १००० रुपये कमी दराने तुरीची खरेदी होत असल्यामुळे संतप्त शेतकऱ्यांनी खरेदी बंद पाडली. त्यानंतर सभापतींच्या कक्षात ठिय्या देत याप्रकरणी हस्तक्षेपाची मागणी करण्यात आली.

हमीभावापेक्षा कमी दराने शेतमालाची खरेदी झाल्यास कारवाईचा इशारा सरकारकडून देण्यात आला होता. सध्या तुरीचा हमीभाव ५,६७५ रुपये जाहीर करण्यात आला आहे. खासगी बाजारात मात्र तुरीची यापेक्षा कमी दराने खरेदी होत असताना या प्रकरणात हस्तक्षेप करण्यास सरकार अद्यापही तयार नाही. त्यातच गेल्यावर्षीचे कमिशन न दिल्यामुळे खरेदी विक्री संघांनी शासकीय खरेदीवर बहिष्काराचा निर्णय घेतला. ही संधी साधून येथील बाजार समितीत व्यापाऱ्यांनी तुरीचे दर पाडले. 

दोन दिवसांपूर्वी यवतमाळ बाजार समितीत ५,४०० रुपये प्रतिक्‍विंटल दराने तुरीची खरेदी करण्यात आली. त्यानंतर सोमवारी (ता. २१) पाच हजारांपेक्षा अधिकचा दर देण्यात आला. सायंकाळपर्यंत हे दर ४६०० ते ४९०० पर्यंत व्यापाऱ्यांनी खाली आणले. खरेदीचे दर हमीभावापेक्षा ९०० ते १००० रुपयांच्या तुटीचे असल्याचे लक्षात आल्यानंतर शेतकऱ्यांनी याविरोधात आंदोलन सुरू केले.

बाजारात खरेदी बंद पाडण्यात आली. त्यानंतर सभापती रवींद्र ढोक यांच्या कक्षात शेतकऱ्यांनी ठिय्या दिला. परिस्थिती चिघळत असल्याचे पाहता ढोक यांनी तहसीलदार, जिल्हा निबंधकांना पाचारण केले. शेतकऱ्यांना योग्य दर देण्याचा निर्णय झाल्यानंतर तणाव निवळला.

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com