सरकारच्या धोरणामुळेच शेतकरी अात्महत्या

जळगाव : देशातील सरकारचे धोरणच शेतकऱ्यांच्या विरोधात आहे. त्यामुळेच शेतकऱ्यांच्या आत्महत्या होत आहेत, असा आरोप शरद जोशीप्रणीत शेतकरी संघटनेचे प्रदेशाध्यक्ष अनिल घनवट यांनी बोदवड (जि. जळगाव) येथे शुक्रवारी (ता. १) सायंकाळी आयोजित शेतकरी सभेत केला.

या वेळी शेतकरी संघटनेच्या युवा आघाडीचे अभिमन्यू शेलकर, महिला आघाडीच्या सीमा नरोडे, सुकाणू समितीचे एस. बी. पाटील, संघनेचे उत्तर महाराष्ट्र विभागाचे माजी अध्यक्ष कडूअप्पा पाटील, सय्यद अली असलम अली, ईश्‍वर लिधोरे, दगडू शेळके, मधुकर पाटील, राजू चौधरी, देवराम शेळके, दिलीप भावसार, प्रवीण मोरे, दामोदर पाटील, पुरुषोत्तम पाटील, राहुल वाघ, नाना पाटील आदी उपस्थित होते.

देशाला स्वातंत्र्य मिळाले; पण शेतकऱ्याला स्वातंत्र्य मिळालेले नाही. तो संकटात आहे. नैसर्गिक फटका बसतो; पण कुठलीही मदत त्याला मिळत नाही. शेतकरी मेहनत करतो; पण त्याच्या मालाचे दर दुसरेच ठरवितात. त्याचे अर्थकारण कोलमडले आहे.

शेतकऱ्यांच्या प्रश्‍नांवर संघटना रस्त्यावर उतरणार असून, त्याला न्याय मिळवून दिला जाईल. २०१९ ची निवडणूक ही शेतकऱ्यांच्या प्रश्‍नांच्या दृष्टीने महत्त्वाची असून, त्या दृष्टीने संघटना काम करील, असेही श्री. घनवट म्हणाले.

महिला आघाडीच्या सीमा नरोडे, एस. बी. पाटील व इतरांनी या वेळी मनोगत व्यक्त केले. त्यात कपाशीला सात हजार रुपये प्रतिक्विंटलचा दर मिळावा, शेतकऱ्यांसाठी शिंगाडा मोर्चा काढणारे आता गप्प का, कपाशीला सात हजार भाव मागणारे जलसंपदामंत्री गिरीश महाजन हे आता गप्प का, असे प्रश्‍न उपस्थित केले.

१२ डिसेंबरला शेतकरी स्वातंत्र्य मेळावा

येत्या १२ डिसेंबर रोजी शेगाव (जि. बुलडाणा) येथे शेतकरी स्वातंत्र्य मेळावा आयोजित केला आहे. त्यात राज्यभरातील पदाधिकारी, कार्यकर्ते सहभागी होतील. शेतकरी आंदोलनाची दिशा व प्रश्‍न यासंबंधी ठोस भूमिका या वेळी घेतली जाईल, असे संघटनेने म्हटले आहे.